Amma Tóta var hjá okkur í viku, þetta var góð vika með fínu veðri ekki of heitt en sól og blíða alla daga. Amma kom til að skemmta mér á meðan Jón G var að byrja í aðlögun. Sem betur fer, því að JG var ekkert sérlega sáttur við að vera skilin eftir hjá einhverjum ókunnum konum, en það venst eins og allt annað. Hann er núna farinn að vera í vöggustofunni frá kl 8:30 til 14 og er það bara nokkuð gott miðað við aldur og fyrri störf. Hann er að vísu ekki sáttur allan tímann og sefur stutt en hann fær að sitja í vagni og horfa á hin börnin leika sér. Það finnst honum ágætt.

En við amma fórum ss víða, kíktum til Silkeborg og Ry, og ekki má gleyma tuskubúðunum hérna í Århus en við keyptum okkur nokkrar flíkur. Það er alveg best í heimi að kaupa föt með ömmu, hún er svo mikil smekksmanneskja. Ég keyrði hana svo út á flugvöll í gær og finnst skrítið að hún sé farin heim. En svona er þetta.

Alvara lífsins hefst svo á morgun hjá Einari Kára en á morgun er fyrsti skóladagur. Við foreldrarnir förum bæði með, myndum viðburðinn og látum eins og barnið okkar sé fyrsta barnið sem fer í 6 ára bekk. Tja svona er þetta. En hann fer með fína skólatösku frá ömmu Hildi og pennaveski frá Ósk frænku. Ekki amalegt það.