Blessuð blíðan

í veðrinu þessa dagana. Frekar ljúft og gott. Við skruppum eina nótt í bústaðinn til Sigga og Hafdísar. Það var mjög gaman að hitta þau, við erum sennilega búin að eyða meiri tíma með þeim þessa 10 daga sem þau hafa verið í Dk en nokkru sinni áður. Gaman að því, en það er einmitt það sem er svo lovely við að fá fólk í heimsókn. Það er svo mikill gæðatími sem maður fær.

Á laugardagsmorguninn brunuðum við til baka til Århus, kíktum á ströndina með Óla, Möggu og co. Það var svona líka æðislegt að við hjónin brunnum ! Alltaf pössum við strákana rosalega vel en klikkum svo á að bera á okkur sjálf, furðulegt. Seinnipart dags vorum við í garðinum í huggulegheitum en Karen og Grétar komu í grill og pókerspil. Pókerinn er alveg að koma hjá okkur hjónum og ég held svei mér þá að Gummi hafi rústað keppninni ;-)

Sunnudagurinn er búin að vera huggu og garðdagur. Það er allt að gerast í garðinum og við erum alveg að reyna að skora hátt hjá nágrönnunum, Gummi er alltaf að breyta bæta, fríkka og fegra. Ekki veitir af, púff. Í kvöld er svo stelpuvideokvöld hjá okkur Karen en Grétar og Gummi eru að fara á kallabíó.

Sumar og sól

og svaka stuð. Á sunnudaginn fór Gummi með strákana í heimsókn til Sigga og Hafdísar, ég notaði hinsvegar tækifærið og hvíldi mig vel og lengi (en samt ekki í fatahengi !)
Mér skilst að það hafi verið mikið grín og mikið gaman. Þau skruppu inn til Odense að kíkja m.a á húsið sem Reynald, Sella og Ósk bjuggu í þegar Reynald var í tæknifræðinámi. Gummi stóð sig bara vel í myndamálunum og það eru fullt af myndum á myndasíðunni.

Einar Kári er að fara að byrja í talþjálfun á taleinstituttet í haust. En hann fer þangað 2x í viku í þjálfun. Þetta er voðalega fínt prógramm en það eru 6 börn í hóp og 3 fullorðnir sem vinna með hópinn. Starfsfólkið samanstendur af talmeinafræðingum, sálfræðingum, iðjuþjálfum og sjúkraþjálfum.
Við fórum s.s á kynningarfund á þriðjudaginn, við vorum fyrirfram ekkert spennt fyrir þessu og vorum hálfpartinn búin að ákveða að sleppa þessari þjálfun þar sem Einari hefur farið svo rosalega fram síðan hann byrjaði á nýja leikskólanum. En við ákváðum samt að fara og kíkja á hvernig þetta liti út og hvað væri í boði. Við kolféllum fyrir staðnum, starfsfólkinu og starfinu sem er unnið þarna. Ekki skemmir fyrir að Einar er byrjaður að suða um að fá að byrja í skóla, honum finnst mjög flott að vera að fara í æfingarskóla 2x í viku og getur varla beðið eftir því að byrja.
Það gengur ekki eins vel að fá hjálp fyrir Guðna, en við fórum á fund með félgasráðgjafa í gær sem skilur ekkert í þessu að barnið sé ekki búið að fá hjálp þrátt fyrir að það sé búið að rannsaka hann hátt og lágt. Það er ekki eins og sérfræðingarnir séu ekki sammála okkur um að það þarf að hjálpa drengnum og það sem fyrst. Erfitt og þungt kerfi hérna í Dk.

Annars er það helst að frétta af mér og bumbus að ég er orðin mjög ólétt og komin með bjúg, farin að sofa ílla á nóttunni og alles. Ekki skemmtilegt, en ekki nema tæpur mánuður eftir. Jey !

Gestirnir farnir í bili

ekki langt þó. Þau eru núna í bústað sem er ca 1 1/2 klst héðan. En það var ótrúlega gaman að fá þau í heimsókn og erum búin að panta þau í heimsókn sem oftast. Helst á hverju ári.

En við fórum niður í bæ í gær, sýndum þeim aðeins strikið og þær mæðgur Birgitta og Hafdís kíktu aðeins í H&M. Gummi fór auðvitað í pílagrímsferð í Bilka með Sigga og stóru strákana. Það keypti Siggi steikur sem þau hjónin grilluðu af þvílíkri snilld um kvöldið. Nammi, namm hvað maturinn var góður.

En núna erum við 4 1/2 í kotinu aftur en stefnum á að fara að hitta þau á morgun, gista kannski í flotta bústaðnum sem þau eru með að láni. Stefnan er svo tekin á Legoland á mánudaginn. Vonum bara að það verði gott verður ;-)

Allt gengur sinn vanagang

hérna á Flintó, ég bíð eftir bumbubúanum, Gummi vinnur á daginn og stússast í garðinum og ræktinni um helgar.
Strákarnir eru alsælir í leikskólanum og við sjáum þá varla þegar veðrið er gott, þá þjóta þeir út um leið og þeir koma heim. Það er nefnilega mjög spennandi umhverfi hérna, Einar er mjög upptekinn af því þessa dagana að safna skordýrum. Hann er mjög hrifin af sniglum og hann vill helst fara aðeins út að leita áður en hann fer í leikskólann. Svo geymir hann þá í fötu og gefur þeim að borða og drekka. Mjög spennó !

Siggi bróðir hans Gumma og fjölskyldan hans koma svo í heimsókn á fimmtudaginn og það er MIKIL tilhlökkun. Einar spyr á hverjum degi; kemur Ziggi frændi í kvöld ? (hann Einar er svoooooo skemmtilega smámæltur, hann slær öll met) Það verður örugglega mikil gleði og almenn ánægja.

Það eru komnar einhverjar myndir í nýja albúmið á síðunni, ég reyni að setja inn jafn óðum og þær eru teknar.

Hitamet í maí.

Var á laugardaginn, við fórum á uppáhaldsströndina okkar sem er við Silkeborg. Vorum þar allann daginn í rólegheitum og 30° hita. Vatnið er reyndar alveg ÍSkalt ennþá en strákarnir létu það ekkert á sig fá frekar en fyrri daginn. Um kvöldið kom svo Baldvin frændi í pössun og gistingu.

Annars hefur vikan verið fín, ég fór í mæðraskoðun og allt er eins og það á að vera. Blóðþrýstingurinn er fínn og enginn bjúgur. Verst að ég er með klemda taug sem leiðir niður í fót. En það eru bara 6 vikur eftir þannig að........ég hlýt að lifa þetta af.

Hilmar frændi hans Gumma kíkti svo til okkar í gær, en hann var í viðskiptaferð fyrir Sæplast fyrirtækið sem hann vinnur hjá. Hann var s.s fyrsti næturgestur ársins og við vorum þvílíkt spennt að fá hann........eins og við hefðum aldrei fengið gestir áður ;-)

Guðni er hættur með bleiu hérna heima, hann er ekki alveg tilbúin í að hætta á leikskólanum strax en um leið og veðrið verður betra þá fær hann að stripplast meira. Þannig að þetta rennur saman, hann að hætta með bleiu og litla barnið að fæðast. Þannig að ef litlinn verður 3 ár með bleiu þá verðum við Gummi búin að vera stanslaust með bleiubörn í 8 ár. Geri aðrir betur ! Ætli maður fái verðlaun eða eitthvað ?

Framhaldssagan með ofninn

Það kom rafvirki og kíkti á ofninn, ég þurfti að borga honum 300 dkr fyrir að segja mér að hann hefði verið vitlaust tengdur ! NÚ er það ! Frekar fúlt, þannig að núna eigum við þennan fína ofn og hann virkar fínt þó að hann sé ekki með blæstri. Ekkert mál !

Annars gaf sæti maðurinn minn mér áskrift af gestgjafanum og ég verð nú bara alveg að mæla með því blaði. Síðasta blað var sérstaklega velheppnað en í því voru hversdagsuppskriftir, frekar góðar og girnilegar. Þannig að núna er eingöngu veislumatur á borðum hérna ;-) Ekki amalegt það !

Einar Kári verður heima næstu daga en hann er með börnesår, ég hef ekki hugmynd um hvað það er á íslensku en þetta er allavegana bráðsmitandi baktería. Skemmtilegt eða hitt þó heldur.

Ég er sem betur fer búin í skólanum og sit heima og er að klára ritgerðina. Ég var að draga hana fram eftir nokkurt hlé, ég komst að því mér til skelfingar að það eru 2 bls sem ég hef skrifað og ekki vitnað í neitt. Það lítur út fyrir að ég hafi skáldað stóran hluta af fræðilega kaflanum, ég veit vel að ég skáldaði hann ekki en ég finn ekki heimildina ! Furðulegt ! Það er bara púff eins og hún hafi gufað upp. Þegar ég sagði Gumma frá þessu þá sagði hann bara; " já spáðu í hvernig mér líður, ég man aldrei neitt". Í mínu tilfelli lagast þessi gleymska, vonandi fyllist upp í götin á heilanum eftir nokkra mánuði. Þessi ólétta er greinilega stór hættuleg, kannski Gummi sé bara svona eins og eilífðar óléttur. Hver veit, það skýrir samt ýmislegt. Say no more !

Íslandi út en Danmörk inni

Þannig að við höldum bara með dönum á laugardaginn. Það er nú ekki það versta ! Annars erum við líka smá hrifin af norðmönnunum þó það væri ekki nema fyrir búninginn og varalitinn. Og það þora að vera öðruvísi, það er cool.

Annars finnst mér danir oft ekkert cool, ég var að foreldrafundi og það var verið að ræða "kostordning" en við þurfum að smyrja nesti á hverjum degi. Frekar þreytandi......ég og nokkrir aðrir foreldrar viljum borga 300 dkr á mánuði til þess að börnin okkar geti fengið heitan mat í hádeginu.
Það var kosið eins og siðuðu fólki sæmir en valmöguleikarnir voru;

• Já ég vil hafa heitan mat og borga fyrir það.
• Nei ég vil ekki hafa heitan mat og borga fyrir það.
• Nei ég vil ekki hafa heitan mat nema að ALLIR velji að fá heitan mat.

Það eru 60 börn á leikskólanum og það voru 53 sem sögðu já, 7 sem sögðu nei. Ok þá hefði maður haldið að það kæmi heitur matur.........neiii aldeilis ekki því að 45 sögðu; nei ekki nema að ALLIR velji heitan mat. Þar með var þessi tillaga felld. Ég gætir brjálast á þessu viðhorfi dana, allir verða að vera jafnir, sumir eru bara aðeins meira jafnir en aðrir ! Arg ! Fáránlegt að láta minnihlutann ráða.

Hver segir líka að við séum öll eins, afhverju má fólk ekki skera sig úr. Afhverju mega börn ekki læra það að bera virðingu fyrir því að við höfum val í lífinu og það velja ekkert allir það sama. Akkuru, akkuru ! Skil' ed ekki !

Annars er lítið að frétta af eldavélamálunum, ég fékk reyndar rafvirkja til að tengja vélina fyrir okkur. Ég stalst til að segja honum að ég hefði tengt hana, (æi það er bara svo fyndið að sjá svipinn á svona körlum þegar maður segist gera eitthvað svona karlaverk) mér myndi náttl aldrei detta í hug að tengja eldavél, en tilhugsunin er fyndin. Sérstaklega afþví að ég er með SVO stóra bumbu að það er varla séns að ég hafi geta bograð yfir þessu. Múhahaha. En hann útskýrði mjög vandlega fyrir mig að maður MÁ ekki tengja 330 volt í 220 volta vél, ég sagðist LOFA að passa mig í framtíðinni þegar ég væri að tengja ;-) En eldavélin virkar s.s allt nema viftan, en ég hringdi í Elkó og sp um að þeir reddi því. Sjáum til, það kemur einhver á mánudaginn. Vélarskrattinn er nefnilega í ábyrgð, enda ekki nema nokkra daga gömul.

Annars er helgin framundan, við erum búin að lofa drengjunum að fara með þá á MacDonalds, spennó. En ég býst við að við pínum þá til að koma með okkur í nokkrar búðir áður.......svona svo að þeir eigi pottþétt skilið að fara á MacD.

Góða eurovisíon helgi.

Månestue að syngja afmælissönginn

Það kom okkur á óvart hvað það var lítið mál að halda afmæli og bjóða 25 börnum í heimsókn. Enda fyrirmyndarbörn í alla staði. Það var rosalega gaman, mikil dagskrá og Gummi stóð sig eins og hetja í grillinu.
Við fórum svo niður í bæ í BR leikföng en Einar fékk stóra bréfpeninga í afmælisgjöf og hann keypt smá dót handa sér og Guðna.
Annars er hvítasunnuhelgin búin að vera ljúf og góð. Gott veður, sól og hiti, en það spillir nú aldrei fyrir.

Annars er Gummi búin að vera í tengingarveseni. En málið er það að við fórum loksins í Elkó Århusabúa og keyptum okkur eldavél, helluborð og viftu. Ægilega fínt og á ægilega góðum prís. Jæja eftir að hafa komið með fínheitin heim í hús og Gummi búin að henda gamla draslinu þá fór hann að tengja. Tengja, tengja, tengja, en málið er að Gummi kann ekkert að tengja, hann er nefnilega ekki rafvirkji, ólíkt Jónsa frænda sem hefur alltaf tengt fyrir okkur (og alla hina í fjölskyldunni) hingað til. Sem sagt enginn Jónsi þannig að það var hringt í bróður hans Einar Baldvin. (sem er reyndar heldur ekki rafvirki heldur sálfræðingur) En Einar B elskar vesen og honum finnst hann NÆSTUM því rafvirki afþví að pabbi hans og bróðir eru rafvirkjar. Einmitt ! Til að gera langa sögu stutta þá heyrðist hvellur í eldavélinni og síðan kom reykur og vond lykt. Þetta sló út öryggin og allt fór í klessu. Þannig að núna erum við bara með krosslagða fingur að eldavélin góða sé ekki ónýt og ÉG þarf að fara og reyna að skila henni á þriðjudaginn. Gummi er svo hryllilega heiðarlegur að hann myndi aldrei getað logið neinu, en ég sem t.d smygla alltaf geðveikt miklu er alltaf send í svona "díla við þjónustufulltrúann" ferðir. Það hjálpar mér nú líka að ég er KASólétt og erfitt að sjá ekki aumur á mér. Þannig að.........við vonum það besta ;-)

Annars viljum við óska Gumma og Hafdísi til hamingju með eins árs brúðkaupsafmælið sem var í gær. Hildur sys á líka stóran dag í dag en hún er 25 vetra í dag, hurra og til hamingju með það !

Einar Kári sem er 5 ára í dag

En þetta er ein af fyrstu myndunum sem teknar voru af prinsinum. Frekar ílla farinn eftir mikla áreynslu og svo að lokum bráðakeisara. En allt er gott sem endar vel ;-)

Í morgun fékk hann pakkana frá okkur, bróður sínum og ömmum+ öfum. Við gáfum þeim bræðrum fjarstýrða bíla, sem ég veit ekki alveg hvort þeir eða pabbi þeirra var spenntari fyrir. Guðni gaf bróður sínum kappakstursbraut en hann fékk bók og bol frá ömmu Tótu. Amma og afi í Barmó og Garðabæ gáfum honum stóra peninga. En hann ætlar að kaupa Harry Potter galla handa þeim bræðrum,sem hann sá í Legolandi. Rosalega flott.

Í kvöld koma svo EBB og fjölsk í mat. En á morgun kemur leikskólinn í partý. Svaka stuð !

Lasarus

hann Einsi minn afmælisbarn er lasinn. Svo lasinn að hann lá upp í rúmi í móki mest allt afmælið ! Ekki skemmtilegt það. Við gáfum honum smá verkjastillandi þannig að hann hresstist nógu mikið til að koma niður og blása á kertin og leika smá.
En það er alveg ótrúlegt með Einar Kára að hann er alltaf veikur þegar eitthvað er að gerast í fjölskyldunni. Afmæli, jól eða utanlandsferðir, þá er hægt að bóka að barnið er með um 40° hita og allt í volli. Hvað er hægt að gera við þessu ?

Það eru komnar myndir inn á albúmið undir Nýtt albúm. Tékk it out !

Löng helgi

Er snilldaruppfinning. En hérna í Dk er oftast frí á föstudeginum ef fimmtudagurinn er hátíðisdagur. Allavegana er lokað í leikskólanum.

Við fjölskyldan drifum okkur á grensuna og í Legoland í gær. Það var kannski aðeins of löng ferð fyrir okkur öll, við erum hálf asnaleg eitthvað öll í dag.

Gummi er alveg að rokka þessa dagana, fyrir utan það að hafa gerst áskrifandi af gestgjafanum, þá er hann á gingseni og hann er alveg ofvirkur. Sem fær að njóta sín í ræktinni og garðinum. En hann er alveg að gera garðinn úber flottan. Búin að kanntskera, setja niður blóm og svo erum við komin með kryddjurtagarð. Algert æði !

En gestgjafinn er líka alveg að rokka, þetta er snilldar blað ;-) Mæli með því.

Á morgun er svo fyrsti í afmælisveislu, en þá koma íslensku krakkarnir og foreldrar þeirra í 5 ára afmælið hans Einar. Hálfur tugur, það er ekki svo slæmt !
En á fimmtudaginn er svo alvöru afmælisdagurinn, en þá koma Einar B frændi og fjölskylda í mat um kvöldið. Á föstudaginn koma svo krakkarnir af deildinni hans Einsa í hádegismat, það verður örugglega mikið stuð. Ég vona að myndasíðna verði komin í lag þannig að ég geti sett inn myndir af stuðinu.

Fælleshreingerning

var hérna í götunni í gær. Það er alltaf mikil stemning og stuð ! Reyndar þurfti frekar lítið að gera í ár, en það þarf samt alltaf aðeins að sópa og gera huggó. Þetta er fínt tækifæri til að hitta alla nágranana, það eru t.d nýflutt hingað hjón með strák á sama aldri og Guðni. Það verður fínt fyrir hann að fá líka leikfélaga, þá þarf hann ekki alltaf að hanga í Einari og hans vinum.

Það er rosalega gaman í skólanum, ég er núna í socialfag sem er hálfgert félagsráðgjafarfag. Ekki það að við eigum að starfa sem félagsráðgjafar, heldur er verið að kynna okkur helstu reglur og hvernig þær eru notaðar. Ég held að á íslandi heiti fagið fjölskylda og barnavernd. En við erum búin að fá fyrirlestra um misnotuð börn og brotnar fjölskyldur. Svo dreymir mig þetta auðvitað allar nætur. Ekki alveg eins huggulegt, en merkilegt fag engu að síður.

Einar er alveg að brillera þessa dagana, ekki nóg með að hann hjóli eins og herforingi án hjálpardekkja heldur prílar hann í öllum trjám. ÖLLUM ! Hann er nefnilega búin að vera í hugrekki þjálfun hérna heima og í leikskólanum, afþví að hann var svo mikil mús. En núna er hann greinilega orðin LJÓN og nýtur þess í botn. Pabbi hans er reyndar ekki alveg jafn ánægður með þetta, en ég bíð spennt eftir að sjá viðbrögð Gumma þegar hann mætir syninum í 3M hæð. Hvor ætli paniki meira ?

En við erum að hugsa um að smella okkur í Legoland í dag, það er hlýtt en enginn sól. Strákarnir eru búnir að suða um þetta svo lengi þannig að það er ágætt að nota tækifærið ;-)

Undur og stórmerki

Hafa gerst hérna á Flintebakken, Einar er farinn að hjóla án hjálpardekkja. Stórt skref fyrir manninn, lítið fyrir mannkynið ;-)

Annars er helgin búin að vera tíðindalítil, við fórum reyndar í mat til Pálmars og Maríu á föstudaginn en það var frídagur hérna í danmörku. Mjög huggulegt. Gummi fór síðan í smíðaklúbb um kvöldið þar sem liðsmenn Heklu fótboltafélagsins komu saman og spiluðu póker !

Við erum búin að finna ansi sniðugan barnaveitingastað niður í bæ, en þar geta krakkarnir leikið sér í rosalega flottu leiklandi. Það er meira að segja góður matur þar, ekki svona sveitt eins og er oft á þessum stöðum. Bara snilld.

Núna erum við að fara til Einars Baldvins en þar er fólk að fara að monta sig af nýju tækjunum sínum. Eða Einar er að fara að sýna okkur mótorhjólið sitt og við honum nýja bílinn okkar. Sniðugt !

Annasöm helgi

En eftir tiltekt í garðinum og grill um kvöldið í 18° hita og sól þá ákváðum við að skella okkur í Legoland á sunnudeginum eða a jú ja jey eins og Guðni kallar það !. Við vorum meira svo grand að smella okkur á árskort. Þannig að Legoland verður vel kannað hjá okkur í sumar. Stráknum finnst æði að fara þangað og úr því að við verðum heima í allt sumar þá er ágætt að hafa eitthvað að fara um helgar.

Í dag elduðum við svo í leikskóla strákana. Við elduðum íslenska kjötsúpu, reyndar með Nýsjálenskt lambakjöt, en hey, skiptir ekki málið. Súpan var æðislega góð og krakkarnir og starfsfólkið voru mett og sæl eftir matinn.
Einar hafði reyndar smá áhyggjur af þessu og leist ekkert svakalega vel á að hafa kjötsúpu í matinn. Hann sagði við mig rétt áður en við fórum af stað í morgun; "mamma, viltu ekki heldur baka pönnukökur, það þyir öllum krökkunum svooooooo gott, ég er ekkert svo viss um að þau borði súpu" Hann er skynsamur strákur hann Einsi, það er ekki hægt að segja annað ;-)

Erum orðin 5 í heimili

Eftir að marsvín að nafni Bangsi flutti inn til okkar. Marsvínið er s.s skírt í höfuðið á Bangsa kisu sem á heima í Barmahlíð, Einari fannst það eina nafnið sem kom til greina á gæludýr. Fínt nokk, mér skilst að það hafi virkað hingað til. Við erum líka svo mikið fyrir að skíra og heita í höfuðið á einhverjum, tíhí.
En Bangsi er 7 vikna marsvín og hann er ægilegt krútt, hann skalf reyndar af hræðslu fyrstu dagana og leist held ég ekkert á okkur -eða strákana-, en ég held að hann sé að taka okkur í sátt svona smá saman ;-)

Við vorum með heljarinnar grill í gær, 8 fullorðnir og 5 börn. Svakastuð, gestirnir voru lengi og skemmtu sér vel -held ég- Gumma tókst að brjóta stól og svona, þannig að ég held að þetta hafi bara verið vellukkað.

Guðni er allur að koma til, og er farinn að kúka í WC, ok það gerðist 1x en það er þó í áttina. Þannig að nú er staðan 2-1, hann er komin með hár, farinn að nota wc en ekki farinn að tala ennþá. Jú jú hann er farinn að tala fullt, en hann á samt langt í land. Vonum bara það besta með hækkandi sól og allt það.

Vorið er komið

Með öllu því dásamlega sem því fylgir. Það sem mér finnst æðislegast við vorið er að þurfa ekki að kappklæða mannskapinn áður en haldið er út. Það er líka svo gaman að sjá krakkana úti að leika langt fram eftir kvöld bara á peysunum. *Dæs* Þetta er svo mikið æði. Á svona dögum erum við alveg í sjöunda himni yfir því að búa í útlandinu. Alveg búin að gleyma kuldanum s.l vetur ! hehe

Nýr bíll og ný herbergi.

Er það helsta á dagskrá á heimilinu núna þessa dagana. En Gummi skrapp út í sveit og keypti þar nýjan bíl, Fiat Multiple en það er svona 6 manna bíl sem við rúmust öll vel í, meira að segja þegar litla barnið kemur ;-) Við erum alveg í skýjunum með þetta.

Gummi notaði svo tækifærið og fór aftur út í sveit, en í þetta sinn að sækja kojur sem við keyptum handa strákunum. Þannig að þeir fara í stóra herbergið uppi og við í litla. Ansi sniðugt ;-) Núna er Gummi einmitt að leggja lokahönd á undirbúningin, mála og svona. Þetta verður ægilega fínt. Þá fá strákarnir líka almennilegt pláss til að leika sér í. Þá hefur svolítið vantað almennilegt herbergi.

Svo enduðum við sunnudaginn á að fara út í hallargarð drottingarinnar með Loga og þeim bræðrum Aroni og Viðari. Foreldrar þeirra fylgdu reyndar líka með, en það var svaka stuð, grillaðar pulsur og svona. Á meðan var Gummi sveittur heima að gera fínt. En það er líka allt orðið svakalega fínt ;-)

Komin heim

Eftir æðislegt frí, við fórum til Beru frænku okkar á föstudaginn langa. En hún og maðurinn hennar eiga 3 stráka, Kára, Ívar og Egill. Það var mjög gaman að hitta þau öll, stráknum fannst dótið á heimilinu geðveikt, og Einar er búin að suða um að fá að hitta frændur sína aftur. Ég held að það hafi eitthvað með Bayblade að gera. Humm, en það er nýjasta æðið hjá strákunum.

Á laugardaginn kíktum við niður í Lyngby, tékkuðum á Magasíni og svona. Um kvöldið fengum við svo matargesti, Birgi eðlisfræðing og kærustuna hans. Það var svaka stuð !

Sunnudagurinn var heimferðardagur, við kíktum niður á strik. Fengum okkur að borða og rölltum um. Púff það var sko nóg af fólki þó að það væri sunnudagur, við erum ekkert allt of hrifin af svona mikill mannmergð :-/ Við tókum bátinn heim um kvöldið og vorum annnnnnnnnsi þreytt þegar við komumst í hús.

Á mánudaginn var ráðist á þvottafjallið mikla sem var eftir ferðina, pjúff hvað það fylgir okkur alltaf mikill þvottur. Við þyrftum að eiga svona risastóra hótelþvottavél sem tekur að minnsta kosti 10 kg. Þá væri stuð í þessu !
Einar Baldvin frændi bauð okkur svo í mat, pásalæri með tilheyrandi gúmmulaði. Ekki leiðinlegt það !

Í dag fór svo allt á fullt, eins og hjá öllum hinum. Gummi í vinnuna, strákarnir í leikskólann og ég í skólann að halda fyrirlestur um verkefni sem ég var að gera. Alltaf nóg að gera á stóru heimili :-)

Köben er enn æði !

En við fórum niður í bæ í gær, fyrst kíktum við á vaktaskipti hjá varðmönnum drottingarinnar. En þeir skipa um vakt kl 12 á hádegi. Það var stappfullt af fólki, svaka stuð. Strákunum fannst þetta nú reyndar ekkert sérlega merkilegt, Einar var mest svekktur yfir því að okkur skyldi ekki vera boðið í kaffi til drottingarinnar. Fuss og svei, að tíma ekki að splæsa á mann eins og einum kaffibolla. Það fannst honum furðulegt !

Eftir höllina fórum við á veitingastað niður í bæ, strákarnir eru orðnir svo stórir og duglegir að það er ekkert mál að fara út að borða með þá. Við fengum æðislegan mexicóskan mat. Nammi namm, rölltum aðeins um strikið, keyptum okkur ís og svona.

Svo fórum við í siglingu um kanalana, en það er skemmtun sem við mælum með. Kostar lítið og er ótrúlega gaman. Það var sérstaklega skemmtilegt að sjá nýja óperuhúsið sem danir eru nú ekkert allt of ánægðir með, segja að það líti út eins og risastór flugstöð. Við ætlum nú ekkert að dæma um það ;-)

Í dag ákváðum við að taka það rólegt hérna í Virum í dag. Rölltum út í næsta Fíat umboð að kíkja á Multiple, sem er sniðugur fjölskyldubíll fyrir svona stóra fjölskyldu eins og við erum að verða. Við fengum að prufukeyra bílinn og Einar Kári var MJÖG ánægður með hann. Hann er nefnilega svodan bílakarl og vill helst ekki kannast við bílinn okkar. Sem er s.s skiljanlegt þar sem hann er nú ekkert mikið fyrir augað blessaður ;-)
Einari fannst bara rugl að vera að skila Multiplenum til baka og vildi ólmur kaupa hann á staðnum. Við reyndum að útskýra fyrir honum að svo klikk værum við nú ekki, og við vildum gjarnan eiga kannski aðeins meiri pening áður en við keyptum okkur nýjan bíl. Ónei ekki til að tala um, nýjan bíl núna, ekki seinna en í gær !!!!

Núna erum við með lambalæri inn í ofni -ekki íslenskt þó !- og erum að hugsa um að "halda" páska á morgun. Á föstudaginn erum við að fara í hádegismat til frænku minnar og á sunnudaginn ætlum við að keyra af stað heim. Og þegar maður er 3ja og 4ra skiptir nefnilega ekki svo miklu máli hvað dagurinn heitir, bara að páskaeggið sé borðað ;-)

Komin til Køben og tad er ÆDI !

Ferðin gekk vel og við vorum komin hingað síðdegis á laugardeginum. Strákarnir stóðu sig eins og hetjur í bílnum á leiðinni. Algerar hetjur !!!

Á sunnudeginum slöppuðum við af, fórum í smá bíltúr og skelltum okkur svo í bíó. Strákarnir fóru á Robotterne en ég fór á danska mynd sem heitir Den store dag og er æðisleg !! Við skoðuðum síðan aðeins Fisketorvet, fengum okkur að borða sveitta borgara og alles. Jömmí ;-)

Í dag kíktum við svo í dýragarðinn við vorum nú ekki svikin af því. Rosalega er alltaf gaman að skoða dýrin, við erum alltaf hrifnust af öpunum og ljónunum. Það er eitthvað svo gaman að sjá apana sveifla sér í trjánum og ljónin eru eitthvað svo tígulleg. Hrikalega flott. Strákarnir fóru meira að segja á "hestbak" smá rúnt. Það var náttl mikið sport ;-) Því miður eru engar myndir til af þessum frábæra degi, það klikkaði eitthvað að taka hleðslutækið með :-/

Annars erum við ákveðin í því að taka það rólega, hvíla okkur og hafa það gott. Borða góðan mat og gera skemmtilega hluti. Þetta er jú svona smá útlönd að vera hérna í Cph, og það er toppurinn að vera í íbúð í hverfi þar sem maður þekkir sig til í. Heppin við að eiga svona frábæra vini ;-)

Á morgun er svo stefnan tekin niður í bæ, ætlum að sigla kanalana, sjá verðina skipta um vakt hjá Höllinni og kíkja aðeins á strikið.

Lítið að frétta

Það er bara föstudagur í okkur öllum, Gummi er á vinnudjammi og við strákarnir fengum okkur heimatilbúna pizzu og kók. Svo er nammi og disney. Ekki leiðinlegt það ;-)

En vikan er búin að vera strembin, ég var að skila stóru verkefni í skólanum. En ég var með danskri bekkjasystur minni að skrifa um börn innflytjenda. Spennandi. En við skiluðum af okkur í gær og svo er flutningur verkefnisins á þriðjudaginn eftir páska.

Við erum svo að fara til Köben á morgun. Gunni og Þórarna vinir okkar sem búa þar, eru að fara til íslands um páskana og voru svo sæt að lána okkur íbúðina sína um páskana. Það er svo gaman að komast öðru hvoru til Köben, fara í dýragarðinn og tívolíð og svona.

Við fengum meira að segja sendingu í gær, 4 lítil páskaegg og síðustu Idolspóluna. Þannig að við erum vel sett um páskana með nammi og skemmtiatriði.

Annars var Einar að tala um mikið alvörumál við mig. Hann sagðist nefnilega ekki vilja eiga danska kærustu. Hann á nefnilega svo margar kærustur á Íslandi að hann vill ekki að stelpurnar á leikskólanum hérna í danmörku séu að kyssa hann. Jáhá ! Það er nefnilega það !

Gummi veikur

og ég hélt bara svei mér þá að hann myndi hrökkva upp af. Manni var hætt að standa á sama eftir 3ja daga veikindi. Ég var næstum því búin að hringja í VÍS og tékka á líftryggingunni ;-) En ég sleppti því.

Við "græddum" nú samt sem áður hálfpartinn langa helgi afþví að strákarnir voru í fríi á föstudaginn. Voða gaman, við kíktum niður í bæ á barnaveitingastað, en það vakti mikla lukku hjá þeim bræðrum. Síður hjá mér, vondur matur. Það er leiðinlegt að borða vondan mat, það er svo mikið betra að borða góðan mat. Ég veit um hvað ég er að tala ;-)

Á laugardaginn var okkur boðið til Einars Baldvins, en þangað voru saman komin ættingjar mínir úr móðurfjölskyldunni sem búa hérna í Århús. Það var ansi gaman. Mikið borðað (góður matur) og hlegið.

Á eftir erum við svo að fara í kökubjóð (mikið skemmtilegra að fara í bjóð) til Sölku, Júlla og Loga krútt. Þar verður alsherjar strákasamkoma, en Óli og Magga koma líka með sína stráka. Þar verða örugglega góðar kökur ;-)

Ég hef það mér til afsökunar að hafa mikinn áhuga á mat þessa dagana, ekki get ég verið full. Það viljum við ekki ! En ég er orðin svona eins og stór kisa, sef og borða til skiptis. Bráðum verð ég örugglega grá og loðin eins og Bangsi. En það er nú örugglega ekki það versta ;-)

Grensubúðinn, bíó og matarboð.

Við skruppum í grensubúðina niður við landamæri þýskalands á laugardaginn. Við höfum aldrei farið áður og vorum orðin mjög svo forvitin um hverskonar búð þetta væri. Ég sá fyrir mér að ég gæti valsað um og dundað mér við að skoða allskonar girnilega hluti á meðan Gummi smakkaði rauðvín. Ó nei aldeilis ekki, þetta er hræðileg verslun, fólkið treðst og treðst. Allir ógeðslegar gráðugir í ódýrt brennivín og sælgæti. En við gátum nú tekið þátt í þessu og keyptum fuuuuullt af bjór og gosi.

Svo kíktum við inn til Flensburg, sem er kósi lítill þýskur bær. Þar fórum við á æðislegan ítalskan veitingastað. Nammi namm, en það var algerlega ferðarinnar virði að enda þar ;-)

Á sunnudaginn fór Gummi með strákana í bíó en þeir fengu það sem verðlaun fyrir að hafa verið svo duglegir að sofa í sínum rúmum alla nóttina. Það var kominn svolítill ruglingur á þetta eftir Íslandsferðina og þeir voru að koma inn til okkar allt að 10x á nóttinni. Ekkert sérlega skemmtilegt !

Á meðan þeir voru í bíóinu kláraði ég að þrífa kofann og undirbúa matarboðið sem var um kvöldið en Karen, Grétar, Óli og Magga og co komu í kvöldmat. Það var mikið spjallað og mikið hlegið. Gaman að hittast svona á sunnudögum þeir eru svo dauðir hérna í DK, allt lokað og svona.

En annars eru stákarnir heima í dag, Einsi var með hita í nótt og Guðni er hóstandi þannig að það var ekki annað í boði en að halda þeim heim. En það er nú líka kósi að lengja helgina öðruhvoru ;-)

Það er líka nýjar myndir í albúminu, klikkið á myndir og þá fáið þið að sjá dýrðina ;-)

Snjór snjór snjór.

Og danir alveg að tapa sér í taugaveiklun út af því. Þeir kunna nefnilega ekki að keyra í snjó þessi grey ! Furðulegur andskoti, svo er verið að sópa allar götur eins og ég veit ekki hvað !!! Þetta er smá snjór sem verður farinn eftir nokkra daga, slakið þið á.

Einar er alveg hissa á þessu og inn á milli þess sem hann minnir okkur á að við erum íslendingar þá talar hann um að danmörk sé að verða alveg eins og Ísland. *Hóst* Veit ekki alveg hvernig ég á að taka þessu. En það er svo krúttó að hann lærði fullt af nýjum frösum á íslandi -þá aðallega af afa Einari, en uppáhaldið hans núna er; svolítið klikkaður !-

Helgin var fín, fullt af gestum, Randers regnskov og fleirra skemmtilegt. Gummi er líka búin að vera í lestrarmaraþoni, við keyptum okkur nokkrar -ok margar- bækur á íslandi og hann er búin að vera lesa þær bækur eftir Arnald Indriða sem hann átti eftir að lesa. Það næst varla samband við hann, þ.e.a.s Gumma ekki Arnald, ég veit ekkert hvernig hann hefur það !

Gummi að svæfa og Einar með kisu.

Vikan liðin og helgin framundan.

En það er búið að vera svolítið erfitt að koma sér í gang eftir fríið og allt átið á Íslandi. Erum samt að reyna að taka okkur saman í andlitinu og vera hresssssssssssss. Mjög góð hugmynd hef ég heyrt !

Helgin verður vonandi viðburðarrík, það er von á gestum í hádegis og kvöldmat. Það verður náttl gaman að venju. Eða við vonum það að minnsta kosti ;-)

Komin heim til Århús.

Ferðin heim var svolítið strembin, erfitt að vera 12 klst á ferðalagi. En hvað leggur maður ekki á sig ;-)

Íslandsferðin var æði, við náðum að hitta nánast alla. Allavegana flesta, nokkra í smá stund aðra lengur í mat og alles. En annars vorum við í sundi, bænum og að hitta fólk. Alveg eins og best verður á kosið.

Einari Kára leist svo vel á þetta Ísland að hann vill ólmur flytja aftur. Í hans augum er Ísland núna huggulegheit og hangs. Búa í herbergi hjá ömmu og afa, hafa alltaf kisu og frænkur til að leika við og skreppa í sund svona þegar hentar. Þó að það hafi verið æði í viku að lifa svona lífi erum við hin ægilega fegin að vera komin heim í rútínuna og rólegheitin. En ansi saknar hann Einsi minn kisunar sinnar. Hann talar stöðugt um Bangsa sinn. Svona er þetta.

Erum komin heim til Íslands

og það er æði ! Ferðin var löng og ströng, en sem betur fer var frúin búin að jafna sig á veikindunum. Ég var nefnilega ógeðslega veik á föstudaginn, lá uppi í rúmi allann daginn og gat mig ekki hreyft. Þannig að Gummi þurfti að sjá um allt. Svo vaknaði ég bara svona svakalega hress á laugardagsmorguninn -sem betur fer-. Við fórum í lestina kl 6 um morguninn að dönskum tíma og vorum komin í Barmó kl 16 að ísl tíma. 10 klst ferðalag það !

En við hittum tengdó á kastrup sem voru okkur samferða til Íslands. Einar sat í góðu yfirlæti á milli þeirra á leiðinni, svo góður og sætur ;-) En ekki hvað.

Svo skelltum við okkur í afmæli til Möggu Móðu, systur ömmu Hildar. Það var rosalega gaman, og sérstaklega fyrir krakkana en stelpurnar hans Einars -hann segir alltaf; ég á stelpur á Íslandi, þær heita Júlía Kristín, Ninja og Jónína- voru það líka og það var hátið í bæ, bæði fyrir börn og fullorðna.

Framundan eru svo heimsóknir og hugguleg heit. Ætli við viljum nokkuð fara til baka ?

Endalaus veikindi og volæði !

En Guðni er ennþá lasinn, greyið litla. Núna er hann kominn með hlaupabóluna. Frekar leiðinlegt. En hann er mikið slappari en Einar Kári varð, Einar svaf bara, en Guðni vælir út í eitt ! Humm ekki skemmtilegt til lengdar. En við erum fegin að hann beið ekki með að veikjast þangað til að við komum heim. Búhú það hefði orðið fúl að eyða viku heima í veikindum !

Það verða engar hlaupabólumyndir af Guðna, myndavélin er biluð ! Vonandi getum við blikkað mömmu og pabba til að fá þeirra myndavél lánaða þegar við förum heim til íslands. Ekki er hægt að fara og hafa ekki myndir af ykkur öllum. Nei hey það er sko ekki í boði !

Hérna eru þeir bræður að leika með lestina sem þeir fengu í jólagjöf frá okkur. Ægilega fínt !

Annars er það helst að frétta að það er búin að vera Festelavnshelgi. Við skruppum niður í bæ að kaupa afmælisgjöf því að okkur var boðið í afmæli til Örnu Rúnar -Þóru og Árnadóttur- systur hans Hjalta. Það mættu allir í grímubúningum og borðuðu kökur. Takk fyrir okkur ;-)

Á sunnudeginum héldum við okkur innan dyra og höfðum það huggulegt. Tókum aðeins til og þrifum svona fyrir íslandsferðina. Eftir hádegi var svo festelavnsfest hérna í götunni og það var rosalega mikið stuð. Það mættu fullt af krökkum og foreldrum. Það voru bollur og sleginn "kötturinn" úr tunnunni. Einar varð meira að segja Festelavnskóngur afþví að hann sló botninn úr tuninni. Hann fékk kórónu og fínerí. Því miður eru engar myndir til á heimilinu af þessum merkisviðburði þar sem BÁÐAR myndavélarnar eru bilaðar. Frekar fúlt. En ég þarf að drífa aðra þeirra í viðgerð þannig að við getum tekið myndir á íslandinu.

Vikan framundan er þéttskipuð að venju, ég er að fara í gang með stórt verkefni ásamt danskri skólasystur minni. Við ætlum að skoða leikskóla úti í Gellerup -aðal innflytjendahverfið- þar sem eru eingöngu börn af öðrum uppruna en dönskum. Það verður spennandi að fá að sjá og skoða hvernig "sérfræðingarnir" skipuleggja dagskrána.

Við vonum bara að allir haldi heilsu og geti mætt í leikskóla, skóla og vinnu. Það má nefnilega ekkert útaf bregða-frekar en venjulega- ef allt á að nást fyrir fríið.

Einar Sundkappi á sundnámskeiði. Rosalega flottur !
Við löbbum alltaf út í sundlaug en það er sama leiðin og við löbbum í leikskólann. Um daginn var ég að labba með þeim í leikskólann og Guðni var með læti -aldrei þessu vant (NOT)- Einar hastaði á hann og sagði ;"Guðni hættu þessum látum, barnið sem mamma er með í maganum fær verk haus". Þvílíkt krútt, það þarf kannski ekki að láta þess getið að Guðni hlýddi ekkert og hélt áfram að vera með læti !

Ég er kominn á fullt í næsta verkefni í skólanum og er þvílíkt spennt. Það er einmitt verið að fjalla um aðaláhugamál mitt og það sem ég er að skrifa um í B.ed ritgerðinni minni. Þannig að ég er liggur við með tárin í augunum mér finnst þetta svo mikið æði.

Það er alltaf brjálað að gera í vinnunni hjá Gumma og við erum orðin spennt að komast heim á litla skerið að hitta ykkur öll. KNÚS ;-)

Þetta er hann Einar Kári hlaupabólustrákur. Hann er nú alveg með á hreinu afhverju hann er með hlaupabólu en það er afþví að hann hljóp svo rosalega hratt inni í fællessal. Einmitt þá vitið þið það kæru vinir, aldrei hlaupa of hratt.

En okkur var einmitt boðið í afmæli í gær til hennar Emilíu sem varð 5 ára. Það var auðvitað mikil tilhlökkun og spenna en Einsi var allt allt of lasinn til að mæta. Gummi var að vinna lengi og því hljóp draumabarnapían í skarðið fyrir okkur. Hann Grétar kom og reddaði okkur svo að við Guðni og Karen gætum farið í afmælið. Við vorum ekki svikin af veitingunum og þökkum fyrir okkur ;-)

Framundan er svo helgin og einhver boð. Vonandi komumst við ;-) en enn meira vonum við samt að Guðni fái líka hlaupabólu, íllu er best aflokið !

Þeir eru lasnir strákanir, það var hringt af leikskólanum og við beðin um að sækja þá. Elsku karlarnir, en núna liggja þeir saman uppi og horfa á sjónvarpið. Svo mikil krútt.

Annars vorum við á maraþonfundi í leikskólanum þeirra þar sem var verið að ræða tungumálaerfiðleika þeirra. Það er öllum hulin ráðgáta hversvegna svona vel fúkerandi drengur eins og Guðni skuli ekki tala. Á fundinum voru fyrir utan okkur sálfræðingur, talmeinafræðingur, leikskólastjórinn og leikskólakennari. Mjög áhugavert.
En Einar fer í sérstakan málörvunarhóp 2x í viku, sá hópur er á vegum ráðgjafamiðstöðvarinnar. En það verður ekki fyrr en eftir 3-4 mánuði. Spennandi að sjá !

Annars erum við hress þrátt fyrir kulda og hor. Það lagast eins og allt annað ! ´ik eins og danirnir segja ;-)

Við fórum í ræktina og ákáðum að koma við í búð til að kaupa ný skæri. Það þurfti nefnilega að klippa Einsa Karlinn. -Guðni er ennþá með svo lítið hár !- Það tókst með svona miklu ágætum. Hann er svona ægilega ánægður með útkomuna blessaður ;-)
Annars er helst að frétta að við erum að fara í matarboð í kvöld til Family Fjeldsted. Það verður alveg örugglega mjög skemmtilegt.
Við fengum líka bréf frá spítlanum þar sem stóð að þeir ætla að sækja barnið 15. Júlí. 2005 kl 11:45.
Það stóð nú reyndar ekki kl hvað en það hefði verið fyndið !

Nýjasta "trendið" á heimilinu treflar um hálsinn við matarborðið. Það er allt i einu orðið ógeðslega kalt og mikið rok hérna. Burr. 

Nýjasti meðlimurinn í fjölskyldunni Flintebakken. Við erum í skýjunum með væntanlega fjölgun en von er á litla barninu 27. Júlí. Foreldrarnir gera ráð fyrir að þetta sé þriðji drengurinn enda fáránlegt að breyta uppskriftinni fyrst að hún virkar svona vel. Vinnuheitið er Jón !

Árskort

í Rander Regnskov er komið í hús og förum við á laugardaginn að kíkja á eðlurnar, slöngurnar, apana og fuglana. Mjög spennandi. Eftir dýragarðinn var farið á MacDonalds og það var æði ! Eða það fannst allavegana strákunum. Okkur hinum fannst það kannski allt í lagi, samt er MC komin með einhverja stefnu um að vera með gæðakaffi og með´í. Allt í lagi en engin svakaleg gæði.

Dagurinn í dag var afslöppun og hugguleg heit, kanínuróló og kaffiboð. Búin að gera nóg fyrir börnin í bil.

Guðni sterki og sundnámskeið !

Guðni er rosalega sterkur -að sögn Einars Kára sem er höfðinu hærri- en það voru stelpur að stríða þeim í leikskólanum og Guðni tók sig til og potaði í augun á þeim. Þær voru svo hræddar að þær hlupu og burtu. Guðni er hetjan hans Einars sem þorir aldrei að berja neinn nema hann ! Furðulegt ! Við foreldrarnir vorum að sjálfsögðu ekkert rosalega ánægð með framtak yngra eintaksins að pota í augu en eftir að hafa talað við starfsfólkið þá skilst okkur að stúlkurnar hafi átt þetta kannski örlítið skilið.

Einar Kári er byrjaður á sundnámskeiði sem er 1x í viku. Það heitir Plask og leg, en það er aðallega til að gera börnin örugg í vatni og æfa þau fyrir komandi sundæfingar. Mjög sniðugt ! En það sniðugasta er samt að þetta er hérna rétt hjá og við erum enga stund að labba þetta.

Brjálað veður

hérna í Dene. Við hjónin létum það nú ekki aftra okkur í að skella okkur í ræktina. OK, reyndar brá okkur smá að sjá tré sem hafði rifnað upp með rótum. En hey ! hvað er það milli vina.

Eftir hádegi ákáðum við að kíkja í Idé möbler að skoða húsgöng sem við erum að spá í handa strákunum. Við vorum nú næstum því fokin öll um koll fyrir utan búðina þannig að við ákváðum að drífa okkur heim. Þegar heim var komið leiddist okkur svolítið, ég meina við þurfum ekki bæði að skemmta drengjunum. Þannig að við fengum þá snilldarhugmynd að mála litla herbergið og skipta um herbergi við strákana. Við höfðum nefnilega verið svo séð fyrir nokkrum mánuðum að kaupa málningu á tilboði og eins bæs til að bæsa loftið. Þannig að við erum búin að taka vaktaskipti á drengina, og skiptast á að mála.

Púff samt hvað ég nenni þessu ekki lengur !

Gleðilegt ár og takk fyrir þau gömlu.

Jólin eru liðin og við erum hálf grá og guggin eftir ofát og huggulegheit. Það er erfitt að snúa sér að verkefnum hversdagsins.

En við erum rosalega ánægð með allar gjafirnar fínu sem við fengum. Við fengum aðallega bækur sem er nú ekki leiðinlegt hérna í útlandinu þar sem ekki er hægt að kaupa íslenskar bækur. Benedikt búálfur og drekasögurnar eru alveg að slá í gegn.

Það voru líka slegin persónuleg met í matreiðslu, það tókst að elda kalkún á aðfangadagskvöld og brúna kartöflur á nýársdag. Eitthvað sem við erum búin að stefna á lengi. Ótrúlega villt hjón :-)

Einar Kári er byrjaður á nýja leikskólanum eða sama leikskóla og Guðni er á. Þeir eru rosalega ángæðir þar. Fyrsta daginn hans Einars ætlaði ég að sækja hann um hádegisleitið, ekki láta hann vera of lengi fyrsta daginn. Nei, þá neitaði hann að koma með mér heim, þannig að það hefur ekki verið nein aðlögun. Rosalega fínt hvað hann er ánægður, þá erum við öll svo mikið ánægðari.

Jólin alveg að koma

sem okkur finnst ótrúlegt hérna í 10° hita og rigningu. Ekki mjög jólalegt. Danir eru heldur ekki jafn skreytingaglaðir og íslendingar þannig að okkur finnst hálf grátt út að líta.

Amma Tóta rokkar eins og fyrri daginn. Hún er búin að kenna Einari að telja, draga frá og leggja saman. Svo ætlar hún að fara að kenna honum að skrifa nafnið sitt og spila á spil. Guðni er farinn að segja Tóta -mömmunni til mikillar gleði - þannig að við sjáum fram á með þessu áframhaldi getum við afbókað talmeinfræðingin og sent Einar beint í grunnskóla eftir áramót. Þær eru nefnilega svo magnaðar þessar ömmur !

En annars erum við bara í rólegheitum og hygge. Vona að þið hin séu það líka.

Gleðileg jól öll saman !

Hátíð í bæ.

Enda frúin komin á fertugsaldurinn. Við buðum nágrönnum okkar í mat á föstudagskvöldið, en þau eiga 3 dætur á aldur við strákana. Það var æðislega gaman, það var boðið upp á íslenska fiskisúpu og lagtertu ala Gummi. Partýið byrjaði kl 17:30 og þau fóru um kl 23. Krakkarnir duttu reyndar út eitt af öðru en þau stóðu sig ótrúlega vel.

Laugardagurinn var prinsessudagur en afmælisbarnið fékk sérpanntaðan morgunmat og opnaði pakkana. Takk fyrir mig öll saman ! En forréttindi dagsins fólust í að vera uppi í rúmi að lesa og hanga í náttfötunum allan daginn. Ekki leiðinlegt það.

Í dag komu svo íslenskuvinir okkar sem ætla að vera hérna um jólin í hádegismat. Það var fiskisúpa........aftur ! Lagkaka og det hele. Það var heldur ekkert leiðinlegt, fullt af pökkum og svona.

Annars eru myndir komnar á myndasíðuna okkar, þannig að..........

Ég C

alveg skýrt án gleraugna. Það er alveg ótrúlegt ! En ég fór í aðgerðina í gær um 1 leytið. Ég var mætt um 12 en þá fékk ég smá róandi, smá svona til að ná að anda ofaní maga. Aðgerðin sjálf tók um 30 mín mér fannst nú reyndar svolítið krípí en vel þess virði. Eftir að hafa hvílt mig í klst kom Gummi að sækja mig. Strax á leiðinni heim sá ég ágætlega en eftir að hafa lagt mig, sá ég nánast fullkomlega. Stórkostlegt ! Svo gat ég horft á sjónvarpið í gærkvöldi án gleraugna. Snilld !

En í dag er síðasti dagurinn hans Einars á leikskólanum, ég ætla að sækja hann snemma. Við erum að fá nágranna okkar í mat í kvöld og ég þarf að fara að versla og svona.

Svo er það bara ammæli á morgun the big 3 0 . Gjafirnar streyma inn frá íslandi og ég hlakka voðalega til að opna þær á morgun. Ekki búin að kíkja í eina einustu, alveg satt :Þ

Hérastubbur bakari

tók sér bólfestu í Gumma á sunndaginn og hann bakaði bara alveg fullt. Brúna lagtertu með smjörkremi og piparkökur. Ægilega fínt ! Strákarnir hjálpuðu okkur við að skera út piparkökurnar, en við lögðum ekki alveg í að lita þær með glassúr. Kannski eftir nokkur ár ! Það eru komnar myndir af herlegheitunum á myndasíðuna.

Guðni er alveg búin með aðlögunina á leikskólanum, og núna er hann allan daginn. Hann tók þetta í nefið, þessi dugnaðarforkur. Einar getur ekki beðið eftir að byrja og spyr á hverjum degi; fæ ég nú að fara í skólann með Guðna. En síðasti dagurinn hans Einars verður á föstudaginn, við ætlum að leyfa honum að taka almennilegt frí. En amma Tóta kemur svo á mánudaginn. Nóg að gerast !

Kalli kónguló !

kom inn til okkar í morgun. Það heyrðust svoleiðis skaðræðisvein í bræðrunum, einmitt þegar við foreldrarnir vorum að reyna að sofa aðeinssssss lengur. En þeir bræður hafa erft þann arf úr föðurætt að vera hræddir við allskyns kvikindi. Ég hins vegar reyni að sannfæra þá um að þetta séu allt vinir mínir og gef út þær skipanir að það megi ALLS ekki drepa þessi saklausu kvikindi -s.s kóngulær og húsflugur- En ég tók myndir af þeim bræðurunum með Kalla og þær myndir eru komnar á myndasíðuna.

Guðni er byrjaður að tala meira og meira, enda svo sem 3ja þannig að.........En núna segir hann Shrek í tíma og ótíma, með þessum líka hreim. Mjög fyndið ! En hann segir ekki frekar en fyrri daginn mamma eða pabbi, hann ætlar að eiga það til góða !

Gleðilegan kreisíber allir saman.

Taske

sem er jólasveinastrákur kom heim með okkur í gær af leikskólanum hans Einars. Hann kíkti með okkur í jólagleði í leikskólann hans Guðna þar sem borðið var fram jólglögg og eplaskífur. Ægilega huggó ! Hérna er mynd af Einari og Taske.

Ég var að frá bréf frá augnklínikkinni sem ætla að laga nærsýnina hjá mér. Það kom í ljós eftir skoðun að ég er með þykka hornhimnu og smá sjáöldur sem ku gefa bestan árangur í svona meðferð. En reyndar hafði sjónin versnað töluvert síðan ég hafði farið síðast til augnlæknis og ég er komin með -7,25. En ég má s.s búast við að hafa 100% sjón á 30 ára afmælinu mínu. Jey hvað það er æðislegt.

Bæjarferð

var á dagskrá hjá okkur í dag. Það er alltaf voða ævintýri að fara niður í bæ, sérstaklega ef þessi stóri guli keyrir okkur. Í bænum fórum við í dótabúðina en það er alveg fastur liður. Það er SVO gaman, Gummi hitti okkur þar og við fórum á kaffihús. Einar er svo mikill nautaseggur að hann elskar að fara á kaffihús ;-) Þetta var indælisferð í góðu veðri.

Gin og klaufa

eða handa, fóta og munnsjúkdómur herjar á litla Guðna núna. Elsku karlinn, hann er allur í blöðrum í munninum og getur ekki kyngt. Hvað þá drukkið pelann sinn, elsku karlinn. En þetta gengur vonandi fljótt yfir. Guðni var nefnilega að byrja á leikskóla eða börnehave og er í strangri aðlögun þar.

Annars erum við hress og kát, erum búin að setja upp jólaskrautið og syngjum með jólalögum. Æðislega væmin öll, við og jólalögin ;-)

Smá misskilningur !

Fréttir frá Danaveldi:
Danskt e-magasin sem heitir "vidste du det" sendi á dögunum mail til áskrifenda með fróðleiksmolum um jólahald í öðrum löndum og þar stóð meðal annars: Julesvinet kommer På Island fejrer man d. 23. december "Thorlåksmessa", og denne dag spiser mange den traditionelle ret gravad rokke med smeltet fåretalg og kartofler. D. 24. december minder meget om vores jul, men på Island er det ikke julemanden, der kommer med gaverne, men derimod "jolasveinen" eller julesvinet. D. 5. januar slutter julen, og man brænder juletræet af uden for huset, mens man udklædt som alfer danser om bålet. http://www.vidstedudet.dk/

Íslenskur matur er vibbi

og þá er ég að tala um hnoðmör, siginn fisk og hrútspunga. Eða allan skemmdan og myglaðan mat sem íslendingar láta sér til munns. Margir halda meira að segja sérstakar hátíðir í kringum skemmdan mat, ég held að það sé kallað Þorrablót. En við erum lukkuleg hérna í danmörku með lifrarkæfu og markríl. Játakk.

Það voru íslenskir stúdentar á Öresundskollegie því góða kollegie sem ég bjó á mín yngri ár. Þetta par hneigist til skemmds matar og það lyktaði allt af signum fiski öðru hvoru á kolleginu sérstaklega í miklum stillum. Þau fengu vatn í munninn og gátu varla talað um annað en hvað þau hlakkaði til að fá almennilegan siginn fisk. Það var reynt að redda hjá fisksala sem keyrir um norðurlöndin til að selja íslendingum fisk en því miður, enginn siginn fiskur. Þau voru friðlaus, þar til að það kom í ljós hvaðan lyktin af signa fiskinum hafði verið. Þá hafði ungur svíi legið látinn inni á herbergi í 4 vikur.

Jáhá !

Afmælisveisludagurinn

búinn, það er búið að vera stanslaust stuð alla helgina. Rosalega gaman.
Í dag var veisla frá kl 11 og það var rosalega gaman. Síðustu gestirnir fóru um 6 leytið um kvöldið. Æðislega gaman.

Takk fyrir drengina, við erum alveg agndofa yfir öllum fallegu gjöfunum sem þeir fengu. Nú eiga þeir sko alveg ROSALEGA mikið dót. Takk takk. Það eru komnar myndir á myndasíðuna okkar

Það var svolítið fyndið á föstudaginn þegar við vorum að sækja Gumma niður á lestarstöð þá var Einar svo mikið að tala um að hann saknaði pabba síns. Ég var aðeins orðin þreytt á að hlusta á hann og sagði ; "já en veistu Einar ég sakna pabba líka, hann er maðurinn minn".
Einar hugsaði sig um og sagði "já en hann er líka maðurinn minn"
Ég; "nei hann er pabbi þinn en maðurinn minn."
Einar; "mamma það er ekki rétt, við eigum hann öll saman, þú segir það alltaf sjálf"
Kolféll á eigin rökum. Ég verð að sætta mig við það, við eigum hann ÖLL saman !

Gummi er að koma heim

vííí hvað okkur hlakkar til. En hann er með 12 kg í yfirvigt + allar dósirnar sem hann er með í handfarangrinum. Það er nefnilega ekki hægt að halda jól án ORA. Þá er verið að tala um grænar og fiskibollurnar. En mig grunar nú að jólagjafirnar taki svolítið pláss og séu kannski svolítið þungar. Kannski leynast líka einhverjar afæmlisgjafir en Guðni verður 3ja á laugardaginn og ég 30 18.des.

Afmælisveislan verður s.s á sunnudaginn kl 11. Það verður hádegisverðarboð, ægilega huggulegt. Pizzur og kökur. Ægilega huggulegt !

Tómlegt í kofanum

án pabbans á heimilinu. Einar Kári saknar pabba síns voðalega mikið -að eigin sögn- og suðar um að fá hann til baka, fljótt. Við Guðni erum hinsvegar ekki jafn ílla haldin af söknuði, kannski er það afþví að þegar Gummi er ekki heima þá getum við borðað rúgbrauð með makríl og majó án þess að það sé fitjað upp á nefið ! Okkur Guðna finnst makríll herramannsmatur en erum það smekkleg að hlífa sumum við ilminn af þessum herramannsmat.

Einar Kári

er svo sniðugur. Síðustu helgi á laugardeginum þegar mamma og pabbi voru í heimsókn spurði ég hann hvað við ættum að gera með ömmu og afa á sunndeginum. Hann var nú alveg með það á hreinu ; förum á morgun með þeim í flugvélina og fljúgum til Íslands með þeim. Það er svo gaman á íslandi, þar get ég klappað kisunni minn, leikið við stelpurnar mínar og keyrt jeppann minn. Ekki leiðinlegt það !

En annars er allt fínt að frétta, það er orðið kalt hérna, burr. Gummi er að fara á jólahlaðborð í kvöld en ég og strákarnir höldum partý. Krakkapartý með nammi og teiknimyndum. Vei vei !

Jólapakkarnir

sem amma og afi í Barmó komu með eru ótrúlega spennandi ! Einar Kári skilur ekkert í þessu og spyr svona 100x á dag; eru jólin núna komin ! Elsku karlinn, en rosalega hlakka ég til að halda upp á jólin með honum. Þetta er í fyrsta sinn sem hann er í alvöru að fatta þetta allt með jólin og pakkana.

Hann á ammæli í dag

hann Gummi hann er 36 ára í dag. Jey jey jey.

En það er búið að vera mikið fjör alla helgina, mamma og pabbi eru í heimsókn og það er nú sjaldan leiðinlegt í kringum þau !

En það sem er búið að vera að bralla er helst; búðir, góður matur, bjór, kaffihús, bíltúrar, bazar vest og margt margt fleirra. Strákarnir eru auðvitað alveg í skýjunum með þetta allt saman, amma og afi eru nefnilega svodan uppáhald !

London er ÆÐI

Við hjónin höfðum það svo huggulegt. Það var slakað á, sofið, farið út að borða -oft á dag !- , verslað og það allt án barna. Jáhá það gerist nú ekki oft. En við nutum þess í tætlur að fá að vera bara 2 að hanga. Ummmmm.

Mamma Mía söngleikurinn er algert æði, sérstaklega fyrir Abbaaðdáendur. En Abba hefur verið í miklu uppáhaldi hjá okkur hjónum. Þegar Gummi var yngri þá hélt hann að lagið; give me a man after midnigth væri Gummi Gummi the man of the midnigth hann var auðvitað ægilega ánægður með þessa hljómsveit sem söng svona fínt lag um hann. Fyrir stuttu fattaði hann hvernig alvöru textinn er, en þrátt fyrir það hélt hann áfram að halda upp á þetta fína band.

Annars viljum við þakka Þóru og Árna fyrir að hafa haft Guðna og Einari B og Heiðbrá fyrir að hafa haft Einar Kára. Karen og Grétar lögðu líka sitt að mörkum og viljum við einnig þakka þeim mikið fyrir ;-)

London here I come !

Svaf ílla í nótt, er ílla haldin aðskilnaðarkvíða. Strákarnir hafa aldrei verið svona lengi hjá öðrum. Nema hjá afa og ömmu í Barmó, en ég held nú líka ef þeir mættu velja þá vildu þeir helst vera þar....alltaf.

En ég vona að þeir hafi það gott um helgina og þeir komi ekki til með að sakna okkar jafn mikið og við söknum þeirra ! Hehehe

Svartur dagur í sögu mannkyns

í dag. Skandall og aftur skandall. Núna erum við Einar Kári orðin veik. Ég meina það !!!!! Gummi er farinn til London og ég er ein með strákana, VEIK ! Forsetakostningarnar í USA blikna við hliðina á þessu. Ég missti af vörninni sem ég var búin að hlakka svo mikið til, leiðinlegt ! En svona er þetta víst, vonandi verðum við búin að jafna okkur sæmilega á föstudaginn, því að ég er að fara til London. Verð örugglega ekki vinsæl ef ég sendi barnið veikt í leikskólann, hvað þá í pössunina. En hvað á mar að gera ????
Einar hlakkar reyndar rosalega til að fara í pössun, Einar B frændi er nefnilega með Cartoon network og ég held að þeir frændur eigi eftir að liggja yfir sjónvarpinu. En það er draumurinn !

Jæja þið megið gjarnan senda mér batnistrauma, þannig að ég verði ekki eins og tuska í útlandinu.

Fredagsbar, gubb og veikindi

er yfirskrift helgarinnar. En frúin skellti sér á fredagsbarinn, í tilefni verkefnaskila sem voru á föstudaginn. Núna er bara eftir að verja verkefnið og þá er áfanginn búinn. Huggulegt það ! En bekkjasystir mín og kærastinn hennar komu með mér heim á eftir barinn. Það vildi svo skemmtilega til að Guðni gubbaði út um allt í uppi í stofu. Ekki eins huggulegt ! En hann er búin að vera lasinn síðan. Elsku karlinn. En hann og pabbi hans misstu því af hádegisverðarboði sem Þóra og Árni voru með á laugardeginum. Takk fyrir okkur góða fólk.

En sunnudagurinn hefur verið langur og strangur. Leiðinlegt að komast ekkert út að hreyfa sig. En framundan er londonferð, vörn og fleirri verkefni. Alltaf nóg að gera á stóru heimili.

Hamborg
er æði. Við heimsóttum Odd Martin vin okkar sem býr þar. Við keyrðum af stað á laugardeginum og vorum reyndar um 4 klst á leiðinni. Þegar við komum til Hamborgar var byrjað á því að fara á veitingahús og fá sér Snitsel, enda ekki annað hægt í þýskalandi. Eða hvað, snitselinu var svo rennt niður með stórum bjórum og allir voru ánægðir með það ! Við urðum auðvitað að fara í þýska matvöruverslun, bjórinn þar er víst mikið betri en í danmörku. *dæs* En við vorum hress það kvöldið ;-)

Daginn eftir keyrðum við aðeins um Hamborg og fórum svo í dýragarðinn. Það var auðvitað hápunktur ferðarinnar. Alltaf svo ótrúlega gaman að fara í dýragarða og sérstaklega að skoða apana. Það er eitthvað svo gaman að horfa á þá. En við keyrðum heim í einum rykk og vorum komin heim um 7 leytið. Ægilega ánægð með þetta allt saman. Það eru komnar myndir inn í albúmið okkar á netinu.

Annars var verið að ákveða að amma Tóta verður hjá okkur um jólin. Oh hvað okkur hlakkar til, strákarnir verða í fríi yfir jólin og þá verður gott að hafa ömmu til að dingla með. En amma ætlar að vera hjá okkur í 2 vikur. Jibbý, skibbý.

Heimildaþættir

eru uppáhaldssjónvarpsefnið mitt. Við erum með 18 sjónvarpstöðvar hérna og fyrir það borgum við 150 dkr á mánuði. Góður díll. Stöðvarnar sem við erum með eru dönsku stöðvarnar en þær eru um 5 og svo eru norskar, sænskar og þýskar. Það er eins gott að halda vel á spöðunum ef maður ætlar að ná öllum góðu þáttunum. Þriðjudagskvöld eru sjónvarpskvöld en þá er á dagskrá þáttur sem heitir Sporlaus en þar er verið að finna týnda ættingja fólks, oft foreldra, í lokinn hittast allir og það er voðalega átakanlegt. -ég fer alltaf að gráta- Síðan kemur danska Idolið sem er svona lala, Friends og svo Amy dómari vinkona mín. Sem sagt fín sjónvarpskvöld.

En á ríkisstöðinni hérna sem heitir DR1 er mjög oft heimildaþættir og ég er algjör sökker fyrir heimildaþáttum, horfi nánast á hvað sem er þegar að þeim kemur. En það sem ég er búin að sjá og man sérstaklega eftir eru þættirnir um;

"Hamingjusömu" Áströlsku hórurnar, sú elsta var yfir 60 ára.
Þýska mannætan sem borðaði tölvunarfræðingin, ég missti matarlystina við að horfa á þann þátt, reyndar bara í svona 30 mín þannig að ekki grenntist ég þá, ónei !
Indversku læknarnir sem selja nýru úr fólki.
Indverskir apaveiðarar sem selja sjaldgæf dýr til auðkýfinga sem hafa þau í einkadýragörðum.
Slúðurblaðamennina sem skrifuðu um síðustu daga Diönu prinsessu.
BUSH "vin" minn og stríðið. Það var frekar óhuggulegt að heyra hvernig þeir fylgjast með fólki, það er nóg að taka vitlausa bók á bókasafninu og eiga vin í Irak, þá ertu pottþétt handtekinn.

Einstaklega áhugavert !

En við auglýsum eftir einhverjum góðhjörtuðum til að taka upp íslenska Idolið fyrir okkur, svona skemmtilegra þegar maður skilur allt sem dómararnir segja. Við höfum fylgst með norska, sænska og danska, en það er oft ansi erfitt að skilja dómarana. Sérstaklega þessa sænsku og norsku. Jiminneini geta þeir ekki sleppt því að hafa dómara sem talar málýsku ??? Mar bara spyr ;-9

En annars er fínt að frétta, ég er búin að finna mér leiðbeinanda. Hún er ráðgjafi hjá leikskólum Reykjavíkur og gerði mastersritgerðina sína um tvítyngd börn. Þannig að það ætti að vera ægilega fínt allt saman.

Strandferðin

sem Einar Kári fór í á föstudaginn með fjölskyldunni hans Andreasar var svona ægilega vel lukkuð. Þau fór í strætó með 4 börn, Andreas, Einar og svo 2ja ára tvíbura sem þau eiga. Hörku fólk á ferð. Sé okkur hjónin í anda nenna þessu, öhöm. En ægilega var Einar lukkulegur með þetta og hann talar mikið um Andreas og fjölskyldu.

Það er síðasti dagur í haustfríi í dag og ég er mjög ánægð með afköst vikunar en það sem stendur upp úr er sýningin hans Ólafs Elíasar á Aros listasafninu hérna í Århús. Við Heiðbrá vorum sammála um að hann skapar ýmis atriði í íslenskri nátturu á alveg sérstakan hátt. Stórkostleg upplifun. En ég náði líka að mála eldhúsið og skrifa 1 ritgerð þannig að ég er sátt. Eldhúsið er orðið æði ! Núna vantar bara nýja eldavél, ég blikka kannski bóndann ef ég fæ einhvern aukapening. *blikkblikk*

Ég er búin að ákveða um hvað ég ætla að skrifa lokaritgerðina mína, en mér tekst ekki að fá neinn til að leiðbeina mér. Núna verð ég reyndar bara að fara út fyrir Kennó til að fá leiðbeinanda, kennararnir sem ég er búin að tala við eru allir í rannsóknarleyfi eða komnir með of marga nú þegar !!! Övböv eins og danir segja !

Guðni og Gummi eru hressir, Guðni er farinn að tala aðeins meira og fyrsta 2ja orða setningin hans var "pabbi prumpa" en það finnst honum óendanlega fyndið !!!! Gumma finnst það reyndar líka fyndið þannig að þeir feðgar geta skemmt sér við að prumpa í kór. Gaman að því.

Fiskasafnið í Silkeborg

var áfangastaður okkar í gær. Heiðbrá og Baldvin fóru með okkur og við skemmtum okkur konunglega. Það er jafnvel verið að tala um að kaupa árskort. Sjáum til. En safnið er mjög skemmtilega uppbyggt og Einar er farinn að hafa mjög gaman að því að skoða vandlega. Guðni er meira að hlaupa um og skandalisera !!!

Það er búið að plana og kaupa íslandsferð í febrúar, í viku 7 n.t.t. Danir eru nefnilega allir í vikunum en fyrir íslendinga þá þýðir þetta að við komum heim 14 feb og verðum í 7 daga. Við fengum far aðra leiðina á 5kr þannig að það kostar um 10 þús á mann. Við vorum búin að lofa okkur því að nota tækifærið næst þegar icelandexpress væri með tilboð. Snilldar fyrirtæki ;-)

Ég var að koma frá augnlækni því að ég las í einhverju heilsublaði að ef maður væri með meira en +/- 6 þá ætti maður rétt á ókeypis laiseraðgerð. Augnlæknirinn var mjög hress með þetta og á næstu dögum/vikum á ég von á bréfi frá augndeildinni á sjúkrahúsinu hérna þar sem ég verð kölluð inn í viðtal og svo aðgerð. Mér líður eins og ég hafi "grætt" 250 þús kall. Hvað ætti ég að gera við peningin ?

Villingapillan

mín er týnd. En það er svona stuð og stemmningspilla. Ég overdósaði reyndar í brúðkaupi í sumar þannig að kannski kláraði ég bara skammtinn. Vonandi ekki lífsskamtinn. En stelpurnar eru að koma á eftir og það er eins gott að koma sér í gírinn. Það er ponsu erfitt eftir erfiði dagsins sem fólst í að;

• Kenna Einari Kára að hjóla án hjálpardekkja. Hann er ekki að ná þessu, kannski afþví að hann er alltaf sítalandi -alveg eins og pabbinn, tíhí- og má ekkert vera að því að einbeita sér að því að halda jafnvægi.

• Fara í leikfimni n.t boltatíma þar sem maður er að leika sér á stórum bolta allan tímann. MUN erfiðara en það virðist. MEN hvað ég var búin á því.

• Þrífa bílinn, kominn tími til. Ég fékk athugasemd frá skólabróður mínum sem benti mér kurteisislega á að bíllinn minn væri MJÖG vel nýttur. Ég ákvað að þrífa hann örlítið, því að þó að hann sé "drusla" þá er alger óþarfi að hann sé eins og "drusla"

• Tiltekt í garðinum. Jiminneini segi ég nú bara. Við hjónin erum svona þokkalega samhent og við vinnum mjög vel saman. En úti í garði er andskotinn laus, við bara þolum ekki garðvinnu og skapið er eftir því. Mjög hvimleitt þar sem nágrannar okkar eru með MEGA flotta garða og okkar er alltaf eins og eftir fellibyl -í beðunum- allt á tjá og tundri. Strákarnir skemmtu sér reyndar konunglega, hlupu um allt með sóp og hrífu að vopni. En við kaupum okkur aldrei aftur hús með garði.

• Matargerðin var svo næst á dagskrá eftir allt puðið. Við keyptum okkur frosinn íslenskan fisk og við erum búin að ákveða að á laugardögum þá ætlum við að elda fína fiskrétti -ég hlýt nú samt að hafa ákveðið þetta, vegna þess að Gummi lét eins og honum kæmi þetta ekki við !- En ég eldaði sjúklega góðan fiskrétt með piparostasósu, með því voru hýðishrisgjón og salat. Nammi namm.

Þannig að minns er ponku þreyttur en hlakkar samt voðalega til að fá hina villingana í heimsókn ;-)

Fullorðins.

Ég svaf eitthvað ílla í nótt og vaknaði kl 5:30, það er aldrei skemmtilegt ! Þrátt fyrir nýju náttfötin og ullarsokkana þá var ég alltaf að rumska. Ég held nú samt ég viti afhverju ! Ég var að velja mér efni til að skrifa B.ed ritgerðina mína um. MEN hvað það er erfitt. Mig langar að skrifa um svo margt, en mér finnst erfitt að skrifa um eitthvað sem ekki vekur hjá mér meiriháttar áhuga því að ég verð ein að skrifa og þá er erfiðara að halda sig við efnið. Ég meilaði allavegana á kennara sem ég hef áhuga á að leiðbeini mér, svo verð ég bara að sjá til. Mér finnst þetta allt of fullorðins eitthvað að velja um hvað maður ætlar að skrifa lokaritgerðina sína um, ég þarf kannski að fara vinna ;-/ Nei varla, ég skelli mér bara í meira nám þá get ég frestað vinnuhugleiðingum um nokkur ár, hjúkkit.

Einar Kári fékk boðskort í hólfið sitt þar sem er verið að bjóða honum í heimsókn til Andreas sem er með honum á leikskóla. Ji hvað hann hlakkar til. Við foreldrarnir ætlum að njóta þess að vera bara með 1 barn og fara í IKEA. Það er nefnilega mun auðveldara að múta 1 barni heldur en 2. Nákvæmlega helmingi auðveldara.

En framundan er haustfrí og frúin ætlar að klára 1 stk ritgerð og mála eldhúsið. Ikeaferðin er til að kaupa dúllerí sem hefur vantað í eldhúsið. Einmitt það !

Á laugardaginn er svo skvísupartý á Flintebakken. Gaman að því, þá ætla skvísurnar í Århús að mæta og hver veit nema að við förum niður í bæ. -Geðveikt villtar píur-

Brjálað að gera

um helgina í félagslífinu. Og ekker smá gaman !

Andreas vinur hans Einar kom með honum heim á föstudaginn. Þeir léku sér eins og englar frá kl 2 til 6. Það var fyndið að heyra hvað Einar er orðin góður í dönskunni. Það tekur greinilega 6 mán fyrir börn að ná góðum tökum á leikmáli. Ég man nú reyndar ekki hvað ég hef lesið það oft, en einhvern vegin er maður svo óþolinmóður þegar um eigin börn er að ræða ! Skrítið !

Á laugardaginn fórum við að hitta strákagengið hjá Möggu og Óla, það var svaka stuð. Þeir klæddu sig í búninga og vorum með atriði. Nú get ég ekki beðið eftir að komast í Disney í London og kaupa flotta búninga handa þeim. Vá hvað þeim fannst þetta ÆÐI !

Sunnudagurinn fór í að laga bílinn, Árni bifvélavirkji læknaði bílinn en ég hafði aðeins breytt honum að framan í sumar. Við breytinguna -sem fólst í því að keyra á bíl með krók- brotnuðu ljósin og Árni var svo sætur að setja ný ljós í fyrir okkur. Svo fær hann eðlisfræðikennslu í staðinn. Ekki slæm býtti það ! Það var svaka stuð hjá strákunum að leika við Hjalta og Örnu Rún, ég held að herbergið þeirra hafi svo gott sem verið komið í öreindir !

Það eru komnar nýjar myndir inn á myndasíðuna sem við tókum þegar við skruppum í bambagarðinn. Bambarnir eru svo góðir að þeir leyfa manni að klappa sér, það er alger hápunktur í svona ferðum.

Stórt skref

var stigið þegar ég ákvað að hringja í foreldra hans Andreasar sem er vinur hans Einars af leikskólanum. Úff hvað mér finnst oft erfitt að hringja í fólk sem ég þekki ekki. En allavegana þá kemur Andreas með okkur heim í dag. Ég ætla að sækja peyjana snemma og gera eitthvað sniðugt með þeim. Vonandi verður gaman og ekki of mikill hávaði. -Ég tala eins og ég hafi aldrei komið nálægt börnum, er næstum því með B.ed í krakkatemjingu-

Verkefnið hjá okkur í skólanum er allt að smella saman. Þetta er rosalega mikil vinna, en rosalega gaman. En á miðvikudaginn verður síðasti dagurinn okkar í frítídsklubben, það verður fínt.

Í skólum hérna í oftast Fredagsbar, MJÖG vinsælt. Hópurinn minn stundar fredagsbarinn grimmt og skilja ekkert í því að ég nenni ekki að fara. Ég er bara orðin svo gömul eitthvað, sé ekki alveg fyrir mér að ég nenni að drekka frá kl 2 p.m til 2 a.m, annað en áður var. Svona breytist þetta, en það er nú samt ómögulegt að vera stúdent í danmörku og fara ekki á fredagsbarinn. Ég þarf nú ekkert að vera á fylleríi til 2 a.m er það ?

Góða helgi..............

Talþjálfarinn

kíkti á Guðna í dag og ég var með. Hann skorar töluvert hærra á íslensku, en samt ekki nógu hátt. Það er ekki alveg víst hvaða hjálp hann fær, en það kemur í ljós í vikunni. Ég er alveg búin að gera þeim grein fyrir að ég vil að hann fái talþjálfun og aðstoð. Vonandi gegnur það eftir ;-)

Helgin var svolítið skrítin hjá okkur. Gummi var ekki heima á laugardaginn, hann var í köben á einhverju "námskeiði" sem ég held að hafi verið dulbúið djamm. En ég var hrikalega dugleg, fór með strákana á róló, í ræktina og svo í afmæli til Soffíu sem varð 20 ára. Eftir afmælið brunuðum við niður á höfn að sækja Gumma.
Á sunnudeginum fór ég og hitti strákamömmurnar á róló. Það var ægilega huggó og strákarnir skemmtu sér konunglega. Karen og Grétar komu svo í mat um kvöldið, gott að enda helgina á að borða með góðum vinum :-)

Annars er allt fínt að frétta héðan, veðrið er ÆÐI og haustlitirnir eru ótrúlega fallegir. Við erum dugleg í ræktinni og verðum vonandi ÖFGA mjó næst þegar við komum til Íslands. Gaman að því !

Tómatsósa í öll mál

væru lög á þessu heimili ef Einar Kári mætti ráða. En hann ræður ekki miklu barnið þó að hann geti ekki hugsað sér neinn mat án tómatsósu. Hrikalega ólekkert eitthvað. Ég sé Einar stundum fyrir mér í framtíðinni með tómatsósu með ; jólamatnum, í eftirrétt eða á kökur. Jakk ! Enda er tómatsósa eitthvað því ógeðslegasta sem ég get hugsað mér með mat, nema þá helst pulsum ;-) þar er hún ómissandi. Guðni er ekki alveg jafn hrifinn af sósunni, þó að hann vilji nú gera ALLT eins og bróðir sinn, og þá meina ég ALLT. Hann hermir allt eftir honum, og ósiðirnir virðast magnast við hvert barn. Hvar endar þetta.............

Gummi er farinn til Köben enn og aftur. Stundum væri örugglega auðveldara ef við byggjum í köben, en við búum í Århús þannig að það þýðir lítið að hugsa um það.

Ég er á milljón í skólanum. Þetta verkefni með víkingana er alveg svakalega stórt og mikið. Samt fáum við ekki einkun, fáum bara staðið eða fallið. En ég held samt að verkefnið okkar sé pottþétt 10+. Ekkert minna en það :-) Annars eru nokkrar myndir af því sem við erum búin að vera að gera á myndasíðunni.

Það er ekkert að frétta að talþjálfunni hans Guðna, hún var veik síðast þegar fundurinn átti að vera og ég hef ekki heyrt í konunni ennþá þannig að hann er ekki farinn að tala enn. Og er ennþá með bleju en hann er komin með hár, þannig að þetta þokast nú eitthvað í rétta átt !

Góða helgi allir saman og takk fyrir að vera svona sæt að kommenta ;-) Þið eruð algjörar dúllur !

Shop til you drop og platafmæli.

Var að koma frá Köben þar sem ég hitti Eydísi vinkonu. Þar var verslað endalaust, frá kl 10 - 17. Smá matar og kaffihlé, ekki mikil þó ! En það var endalaust spjall og gaman.

Gummi var hérna í Århús með strákana á meðan, það var sko ýmislegt brallað. Það voru margar rólóferðir ! Svo héldu þeir feðgar upp á platafmæli, það var bökuð súkkulaðikaka, hún skreytt með kertum og sunginn afmælissöngurinn. Mikil lukka með þetta framtak. Það var ekkert verið að efast um hver ætti afmæli, Einar leysti það einstaklega vel af hendi ; þegar það er platafmæli þá eiga allir afmæli ! En þeir feðgar skemmtu sér vel og ég held að þeir hafi bara ekkert saknað mín. Humm.

En það titrar allt og skelfur hérna í danmörku út af skilnaðINUM. O MEN hvað þetta er mikið mál. Ég keypti mér alveg Extra blaðið til að lesa slúðrið en gula pressan talar mikið um að hann Jóakim hafi alla tíð hagað sér eins og piparsveinn og sé eins og karl faðir sinn að því leytinu til að hann sé mikið fyrir sopann. Og svo er hann víst nískur og heimtar að drekka ókeypis á börum. Fast cars, bus , rock and roll, las ég einhverstaðar. Jáhá, eins og þau virtust happý þegar ég hitti þau í tívolíinu um páskana. Svei mér þá !

Hálf þunglyndislegt
að skrifa blogg og fá engin viðbrögð ! Frekar slappt lesendur góðir, skamm skamm. Ég nenni ekki að halda úti bloggsíðu ef ég hef á tilfinningunni að engin lesi boðskapinn. Skamm skamm. -Taki þetta til sín sem það eiga skilið !-

En annars er allt glimrandi að frétta, ég er núna komin í gang með project nr 2 í fagurfræðiáfanganum mínum. Ég er í hóp með 3 öðrum og við ætlum að vinna með víkingaþema á skóladagheimili. Spennandi. Það er athyglisvert að sjá hvað þau eru vön allt öðrum vinnubrögðum en ég hef lært í kennó. En það er nú meðal annars það sem þetta gegnur út á, læra önnur vinnubrögð.
En ég er komin í annað fag sem heitir værkstedsfag, get ómögulega ímyndað mér að það sé skemmtilegt. Þetta er svona föndur á háskólastigi, sem þýðir að það má ekki lita í litabók og ekki nota form þegar maður leirar *damn* Þannig að ég með mína 10 þumalfingur og þolinmæði á við 5 ára verð að treysta á lukkuna og vona að ég sleppi létt. Ég hata að föndra, og hana nú !

Allir hressir og kátir að venju, ég er að fara á morgun að vera til stuðnings við talmeinafræðingin sem er að fara meta skilning Guðna. Ég á semsagt að segja orðin á íslensku og hún svo á dönsku. Þannig verður vonandi hægt að meta nokkurn vegin hvernig staðan er á skilningnum hjá honum. Þ.e.a.s ef hann verður samvinnuþýður...........humm sonur MINN ! Well sjáum til ;-)

Skólinn
minn var með lokadag niðri á strönd og inni í skógi í dag. Einar Kári fékk að koma með mér þar sem við vorum að sýna verkin okkar. Það var rosalega gaman og það er sniðugt að sjá hvað það komu ótrúlega mismunandi hugmyndir. En Einar stóð sig eins og hetja, hjálpaði okkur að byggja og fékk að fara út á fleka. Rosa stuð. Það eru myndir af þessu á myndasíðunni okkar.

Við fórum á fund með talmeinafræðing í gær í Vuggestuen hans Guðna. Henni leist ágætlega á hann þannig séð. Honum hafði reyndar ekki gengið vel með málskilningin en það var nú kannski bara afþví að honum þoknaðist ekki að gera það sem honum var sagt að gera ;-) En ég fer í næstu viku og ætla vera með þegar hann tekur prófið. Þá segi ég orðin á íslensku og hún á dönsku. Þá verður kannski betur hægt að meta skilningin.

En annars erum við hress og kát. Over and out.

Köben var lovely
það var rosalega gaman að hitta mömmu og pabba. Við fengum við vorum á hóteli við sömu götu og þau. En hótelið þeirra var svona eitthvað ægilega huggulegt ódýrt hótel á meðan við vorum á viðbjóðslegasta hóteli sem ég hef á ævinni séð. Viðbjóður. Vond lykt, skítug teppi og hommateknó staður í portinu sem var með blastaða tónlist til kl 3 um nóttina. Jáhá, gaman að þessu. En við létum þetta samt sem áður ekkert trufla okkur, enda dagfarsprútt fólk.
Það var margt brallað, farið í tívolí, drukknir nokkrir öl og röllt um götur. Ægilega huggulegt. Svo keyrðum við heim á sunnudeginum ánægð með þetta allt saman !

Köben........aftur
núna í dag ætlum við að bruna til CPH og vera í 1 nótt. Hitta ma og pa sem eru að koma frá Argentíniu. Gaman gaman. Við ákváðum að skella okkur og vera í 1 nótt. Það er ekki endalaust hægt að rífast og skammast yfir að fólk nenni ekki að koma til Århús, við verðum líka að geta skellt okkur til Cph. 'ik eins og danirnir segja.

Annars er allt gott að frétta af okkur. Ég er í skólanum á fullu. Við erum niðri á strönd og inni í skóg að gera listaverk. Rosalega gaman og fræðandi. Það er gaman að sjá hvað danir eru mikilir snillingar í að ræða saman og vinna hópvinnu. Það er margt hægt að læra ;-)

Strákarnir eru hressir, þeir eru báðir að fara í mat hjá talþjálfa til að sjá hvort að þeir þurfi talþjálfun. Við vonum að þeir fái allavegana einhvern stuðnin. Þetta gengur ekk svona........ elsku karlarnir. En þeir eru sprækir samt sem áður.

Jæja góða helgi......

Komin heim í heiðardalin
eftir frábæra helgi í köben. Vúhú hvað það var sniðugt að skipta svona um íbúð, strákunum fannst æði að sjá allt þetta nýja dót. Við fengum líka hjól og við hjóluðum út um allt, alveg meiriháttar. En það er líka voðalega gott að koma heim.............

Skólinn er byrjaður hjá mér, ég fór í fyrsta sinn í dag og mér líst bara vel á þetta. Þetta er stór kúrs sem endar á verkefni. Þemaðið í kúrsinum er ströndin og skógurinn. Frekar sniðugt. En við erum að fara í skóginn á morgun og verðum allann daginn. Spennó.

Einar Kári er alltaf að verða duglegri og duglegri í dönskunni. Í gær í bátnum á leiðinni til Århús var hann að tala við einhverja konu og þá heyrðum við hann segja; det er bil, siger min far ! Pabbi minn segir að þetta sé bilað ! Duglegur, þetta er allt að koma.

Köben rokkar
Erum enn og aftur á gömlum heimaslóðum hérna úti á Amager. Ægilega fínt. Við mæðginin vorum að hangast saman í gær á meðan Gummi var í sommerfest. Ægilega gaman. Við fórum út í Amagersenter -sælla minninga- og versluðum þar alveg slatta. Hver segir að það sé ekki hægt að eyða peningum með börn í eftirdragi. Við kíktum svo til Gunna og Þórörnu í mat. Sko ég og strákarnir, Gummi var enn að reyna að skemmta sér á sommerfestinni, en það gekk eitthvað ílla þannig að hann ákvað að koma og hitta okkur í lestinni á leiðinni niður í bæ.

Í dag er sól og blíða og ég var að hugsa um að hljóla með strákana út á róló. Það er svo gaman. Svo væri tívolíið eitthvað sem kemur sterkt inn. Sjáum til. En allavegana er brill að skipta svona um íbúð. Það er ekkert fyrir drengjunum haft, þeir eru svo ægilega ánægðir með allt dótið að það heyrst ekki í þeim. OK kannski svolítið ýkt að það heyrist ekkert í þeim, en það heyrist minna en venjulega ;-)

Það eru komnar myndir úr ferðinni á myndasíðuna okkar. Við ætlum að reyna að vera duglega að uppfæra.

Góða helgi.

Na na na na bú bú

ég er líka búin í prófum. Jey hvað ég er glöð. Ég var nú ekki svona glöð í siðfræðiprófinu í gær. Ég á nú ekkert sérstaklega von á því að ég hafi náð. Ég og kennarinn erum ekki að skilja hvert annað, það er nú bara þannig.
En málþroskaprófið í morgun var nú líka nettur tremmi. Mig vantaði nefnilega nokkrar greinar og ég hafði látið kennarann vita af því. Hún svaraði mér ekki þannig að ég hugsaði ; ok hún veit af þessu, hún á þá ekkert eftir að spurja úr þeim greinum. Það fyrsta sem ég sé svo þegar ég kíki á prófið er grein sem ég var akkurat ekki með ! Heppin ég ! Ég hringdi -alveg brjáluð- í kennarann og fékk sem betur fer aðra spurningu. Heppin ég !
En ég er nú líka búin að reikna út að vonandi er þetta í síðasta sinn -í bili- sem ég fer í próf. Skólinn hérna er bara með verkefni og svo ef ég fer í nógu sniðugt framhaldsnám þá eru bara verkefni þar líka. Bara að finna mér eitthvað nógu sniðugt ;-)

Annars liggur bara vel á okkur. Við erum að fara til köben og ætlum að vera fram á mánudag. Bara í chilli. Gummi ætlar að fara á sommerfest sem fyrirtækið er með í köben og við strákarnir ætlum helst að kíkja á rólóa. Kannski smá að hjóla um............ Nice. Gaman gaman.

Pakki og próflestur
Er þemaið í dag. Próflesturinn mætti ganga betur en þetta mjakast allt saman áfram

Við fengum pakka í dag frá henni Bergdísi, þeirri sómakonu. Hún sendi strákunum videóspólu sem þeir eru ægilega ánægðir með. Við söknum þess svolítið að fá sjaldan pakka, það er svo gaman að fá glaðning að heiman ;-)

En svo er það bara Köben á fimmtudaginn fram á mánudag. Jey hvað það verður gaman. Rosalega hlökkum við til.

Langar að benda á nýju myndasíðuna okkar, þetta barnalandsdæmi er ekki alveg að ganga upp. Hérna Verði ykkur að góðu og góða skemmtun.

Politiken
er eðalblað. Ég er áskrifandi og það kemur á föstud, laugd og sunnud. Ægilega huggulegt, svo endist það mér út alla vikuna þessi 3 blöð.
En allavegana sat ég í dag og var að fletta í gegnum blaðið, sé ég ekki mynd af manni sem er SVO líkur Frikka Weiss. Hva ! ekki það að ég væri neitt svo hrikalega hissa, hérna eru aðalhittin í auglýsingum íslenskir leikarar og svona. Anyways þá athuga ég aðeins nánar greinina og hvað haldiði þetta var Frikki Weiss, noh noh noh. Haldið að hann sé ekki bara að opna kaffihús þar sem maður getur keypt sér að borðað, gluggað í gamlar bækur og þvegið ÞVOTT þetta er sko konsept sem ég fíla. Þegar við bjuggum í köben hérna um árið eyddi ég ansi miklum tíma í svona MÖNT vaskeríer og ég get nú alveg fullyrt það að það er ekki það skemmtilegasta sem maður gerir ! En að fara, skella í eina vél, fá sér latte og kíkja í góða bók. Ekki slæmt það ! En er greinilega ekki jafn hryllilega vitlaus og ég hélt. Ég vissi að hann væri smart og krútt en ekki klár ! Sko kallinn, flott hjá honum !

Soðin fiskur og kartöflur
er uppáhaldsmatur þeirra bræðra og væri á borðum öll kvöld og alla daga ef þeir mættu ráða. Reyndar eru þeir orðnir mikið betri að borða heldur en þeir voru áður og við erum næstum því hætt að elda tvöfalt á hverju kvöldi. En það er anssssssi þreytandi til lengdar.

Einari fer rosalega mikið fram í dönskunni þessa dagana og það er starfsmaður sem er búin að vera í fríi s.l 2 vikur og hann heyrði mjög mikin mun á honum. Víhí við urðum svo glöð ;-) En hann er líka mun glaðari og er hættur að koma heim með sögur um að hin börnin séu að elta hann. Þannig að vonandi er allt í rétta átt.

Annars sit ég á lessal alla daga, er að þræla mér í gegnum 2000 bls lesefni um mál og málörvun þannig að...... ég ákvað að lesa allt lesefnið, ekki stytta mér leið og lesa bara glósurnar. -sem ég hef hingað til gert- En ég hlýt að finna eitthvað um 3ja ára eðlilega greind börn sem eru ekki farin að tala. Það er nú samt ekki mikið af þeim......... öll sem ég hef lesið um og eru 3ja ekki farin að tala eru;

A) Einhverf - það er sko sonur minn ekki ! Það er ég viss um-
B) Greindarskert. -Hva veit mar !
C) Eiga foreldra sem tala ekkert við þau afþví að þau eru fyllibyttur og aumingjar. -Ok róleg mar í ásökununum.
D) Heyra ílla. -Öm ég er búin að láta fullt af sérfræðingum skoða barnið og hann heyrir vel, og skilur allt sem honum þoknast að skilja.
E) Mikið um talgalla í fjölskyldum. -Gæti skeð, gæti verið..........

Hvað haldið þið ? Annars er ótrúlegasta fólk sem hefur ekki byrjað að tala fyrr en eftir 3ja ára aldur. Er meira að segja alltaf að heyra nýjar sögur. Ég er orðin nett pirruð á öllu þessu öööööö, det, det og sífelldar bendingar og meiningar. Sonur minn fattar nefnilega ekki að börn hafa ekki rétt á að hafa skoðanir fyrr en þau byrja að tala. Og hana nú !

En ég er núna að bíða eftir Gumma greyinu sem er að hlaupa boðhlaup með vinnunni. Aumingja hann ;-/ Elsku karlinn, ætli hann getið gengið á morgun eftir þessa 5km. Sjáum til........og ofan á allt saman þarf hann að taka strætó heim. Það hefði ég nú aldrei látið bjóða mér upp á, neitakk ojbjakk...

Vejfest
var í gær í götunni. Það var rosalega gaman. Danir eru svo fælles, möde og leikjaglaðir að það hálfa væri nóg.

Skemmtunin byrjaði kl 14 í glampandi sól og 26° hita. Við sáum um "leiki" fyrir litlu börnin á meðan stóru börnin fóru í ratleik. Brjálað stuð ! Svo sátu allir og chilluðu með öl að sjálfsögðu. Það var slegið upp stóru tjaldi í götunni og um kvöldið var borðað þar. Fleirri bjórar teigaðir og enn meira rauðvín drukkið. Krakkarnir sáu um að skemmta hvert öðru langt fram eftir kvöldi og Einar eignaðist fullt af nýjum vinum. Við kynntumst aðeins fólkinu í götunni og allir voru ægilega þolinmóðir að hlusta á okkur bögglast á dönskunni. Þetta er allt saman fínasta fólk sem er allt ægilega huggulegt.

Núna liggur Gummi hinsvegar uppi í rúmi, alveg búin á því -en ekkert þunnur neitt *NOT*- eftir stuðið í gær. Ég var hinsvegar skynsöm og læddi mér í rúmið kl 12, þannig að ég er hressleikinn uppmálaður *ennmeiraNOT*

Blómin
sem Gummi kom með heim handa mér eru ÆÐI, hann vorkennir mér svo hryllilega að vera að lesa að það hálfa væri nóg. Reyndar vorkenni ég sjálfri mér líka alveg hryllilega mikið þannig að...... en þetta helv*** er rétt að byrja, öll næsta vika og hálf vikan þar á eftir. Ansans.

En annars er allt gott að frétta, það er vejfest á laugardaginn. Þá hittast allir í götunni og gera eitthvað sniðugt saman. Það er stíft prógramm frá kl 14 um daginn og alveg passað að allir fái eitthvað fyrir sinn snúð. Við eigum að sjá um að skemmta litlu börnunum og ég er búin að kaupa andlitsmálingu og spaða sem þau eiga að kasta á milli sín blöðrum með. Svo er íþróttakeppni fyrir fullorðna og alles. Um kvöldið er svo borðað saman og það er bar með bjór þar sem hægt er að kaupa ódýran bjór. Ágóðinn af barnum fer svo í að borga niður matinn, þannig að allir græða. Sniðugir þessir danir. Við erum samt svona nett stressuð, en þetta er nauðsynlegt fyrir okkur að kynnast nágrönnunum. Það er auðvitað líka gott að æfa sig í dönskunni ;-) þetta verður bara gaman ´ik eins og danirnir segja !

Lon og don
eða Lundúnir er staður sem við hjónin ætlum að heimsækja í byrjun nóvember. Ekki leiðinlegt það ! Gummi er að fara á námskeið á fimmtudeginum og föstudeginum, ég ætla að koma á föstudeginum og við ætlum að eyða helginni saman. Vei vei, erum búin að panta okkur miða á Mamma Mía Abba söngleikinn, og hlökkum rosalega til.

Annars voru mamma og pabbi að tilkynna komu sína aðra helgina í nóvember. Þau fengu 18 kr miða með Icelandexpress. Þau stoppa reyndar stutt, verða frá föstudegi fram á mánudag. En það verður gaman að fá þau. Kannski getum við platað þau til að koma með matarkex.......það rokkar á þessu heimili ;-)

Útilegan
stóð sko alveg fyrir sínu. Við lögðum af stað um hádegisleitið í bongóblíðu. Blíðan hélst bara alveg allan tímann og það var sko mikið stuð. Það var sundlaug sem var punkturinn yfir i-ið. Nammi nammi gott að kæla sig niður. En förunautar okkar voru ekki af verri endanum þau María, Pálmar og Emilía sem voru okkur til halds og traust í næsta tjaldi. Þetta tjaldsvæði fær 5 stjörnur, og þá sérstaklega fyrir góða veðrið.

En þið hin sem lesið bloggið og trallið aldrei, skamm skamm. Þið fáið mínus stjörnur. Það er góður siður að kvitta fyrir sig. Humm og ha.

Sumar sól og strönd
er líklega það eina sem er að frétta héðan. Ansi huggulegt það. Það er búið að vera 28°hiti og sól alla daga. Loksins kom sumarið. Ströndin "okkar" er í 15 mín hjólafjarlægð og við höfum óspart nýtt okkur það. Erum búin að vera hitta vini okkar á ströndinni til að grilla kjöt og grilla okkur. Frekar huggó. Strákunum finnst þetta líka algerlega toppurinn að fara og striplast, hlaupa í vatnið og svona.
Annars eru nokkrar strendur hérna og þær eru mjög misjafnar, ströndin "okkar" er samt eiginilega svolítil unglingaströnd, allir eru einhvernvegin í vitlausum hlutföllum -lesis of mjóir- tala rosalega mikið í gsm og eru greinilega að reyna að hözzla. Þar eru engin börn, bara unglingar. -Unglingar eru líka fólk- En á hinum ströndunum er meira svona fólk sem er í réttum hlutföllum -eins og ég- þar er líka fullt af börnum. Mér líst eiginlega betur á þær, en er hinsvegar of löt til að keyra eitthvað lengra. Þannig að ég læt mig hafa það að vera eins og fíll í postulínsbúð. Það er nefnilega það !

Annars er planið um helgina að gera eitthvað skemmtilegt, við erum að fara í matarboð í kvöld og við getum vonandi platað Gumma til að koma í útilegu með okkur á morgun. En hann er búin að lofa sér í eitthvað "fælles" dæmi hérna út á róló. Helv*** danirnir og fælles þetta og hitt. Óþolandi, nei djók, það er verið að byggja róló og allir verða að hjálpast að !!!!

Síðustu gestir sumarsins
eru að fara og það er óhætt að segja að það er búið að vera feikna fjör. Dilek vinkona hans Gumma er mögnuð manneskja, hún kom 19 ára frá Tyrklandi til Þýskalands til að læra stærðfræði. Hún er semsagt búin að vera 18 ár í þýskalandi komin með masterspróf í stærðfræði, vinnur við telecominternet eitthvað sem ég skil ekki, er gift honum Jan sem er ph.d í stjarneðlisfræði og snilldar maður-kokkur-pabbi, býr í Frankfurt og er bara lukkuleg með þetta allt saman. En Dilek hefur þurft að hafa rosalega fyrir öllu, hún hefur sjálf fjármagnað námið, unnið eins og berserkur á börum og öðrum skítabúllum. Hrikalega dugleg og sterk kona. Það er áhugavert að kynnast fólki sem hefur svona mikið lifað og reynt.

En þau hjónin eru semsagt að fara í dag, eftir mikila hátíð í gær því að Dilek átti afmæli og Jan eldaði 3ja rétta máltíð sem sló Ala Tóta alveg út úr keppninni. Ansans........... En þau eru síðustu gestir sumarsins og núna er bara gymmið, ströndin og undirbúningur fyrir sumarpróf. Jey ! Það er svo gaman að þurfa að lesa fyrir próf í 25° hita. Jibbý

Blýfluga, blýfluga
æpti Einar úti í garði í gær. Þeir eru skíthræddir við þessi kvikindi sem eru öll að koma á kreik eftir að sólin fór að skína. En við erum ánægð með sólina, kannski ekki eins ánægð með flugurnar en það rakinn úti er að drepa okkur, úff og púff.